خبروں کے مطابق سڈنی میں جاری تیسرے ٹسٹ کے تیسرے اور چوتھے دن شائقین کے ایک گروپ نے بھارتی کھلاڑی محمد سراج اور جسپریت بمراہ پر نسلی تبصرے کئے تھے۔ بھارتی ٹیم نے تیسرے دن کے کھیل کے بعد اس معاملے میں باضاطہ شکایت درج کرائی ہے۔
واضح رہے کہ بھارتی کپتان ویراٹ کوہلی اپنے پہلے بچے کی ولادت کے سلسلہ میں آسٹریلیا سے ملک واپس آئے ہوئے ہیں لیکن سڈنی میں تیسرے ٹسٹ میں کچھ شائقین کے بھارتی کھلاڑیوں پر نسلی تبصرے کرنے کے سلسلے میں وہ کافی ناراض ہیں۔
ویراٹ نے اس معاملے میں ناراضگی ظاہر کرتے ہوئے اتوار کو ٹوئٹ کرکے کہا کہ "نسلی تبصروں کو قطعی طور پر تسلیم نہیں کیا جاسکتا۔ میں بھی باؤنڈری پر فیلڈنگ کرتے وقت کئی بار ایسی چیزوں سے گزرا ہوں"۔
دوسری جانب بھارتی آف اسپنر روی چندرن اشون نے بھی آسٹریلیائی شائقین کے بھارتی کھلاڑیوں پر نسلی تبصرے کرنے پر عہدیداروں سے سخت کارروائی کرنے کی اپیل کرتے ہوئے کہا کہ ایسے تبصروں پر صرف مایوس کن کہنا معمولی الفاظ ہیں۔
اشون نے چوتھے دن کے کھیل کے بعد ورچوول پریس کانفرنس میں کہا کہ ایسے واقعات سے کافی سختی سے نمٹا جانا چاہیے۔ انہوں نے کہا کہ یہ ایسا پہلی بار نہیں ہے کہ سڈنی میں اس طرح کے واقعات پیش آئے ہیں۔
