انٹرنیشنل کرکٹ کونسل (آئی سی سی) نے فروری کے مہینے کے لئے مرد اور خواتین پلیئر آف دی منتھ کے لئے نامزد امیدواروں کا اعلان کردیا ہے۔ خواتین میں انگلینڈ کی ٹیمی بیومونٹ، نیوزی لینڈ کی بروک ہالیڈے اور انگلینڈ کی نٹالی اسکائیور کو اس کے لئے نامزد کیا گیا ہے۔ جب کہ مردوں میں بھارتی آف اسپنر روی چندرن اشوِن، انگلینڈ کپتان جو روٹ اور ویسٹ انڈیز کے کائل میئرز کو آئی سی سی پلیئر آف دی منتھ کے لئے نامزد کیا گیا ہے۔
واضح رہے کہ 34 سالہ اشون نے انگلینڈ کے خلاف جاری چار میچوں کی ٹیسٹ سیریز میں بلے اور گیند سے عمدہ کارکردگی کا مظاہرہ کیا۔ اشون نے دوسرے ٹیسٹ کی دوسری اننگز میں 106 رنز بنائے جبکہ تیسرے ٹیسٹ میں انہوں نے اپنے کیریئر میں 400 وکٹیں لینے کا کارنامہ حاصل کیا۔ اشون نے تین ٹیسٹ میں 176 رنز بنائے ہیں اور 24 وکٹیں بھی حاصل کی ہیں۔
- یہ بھی پڑھیں:-
- وجے ہزارے ٹرافی 2021 سیزن میں سنچریوں کی جَھڑی
جب کہ روٹ نے سری لنکا اور بھارت کے خلاف لگاتار تین سنچریاں بنائیں، جن میں دو ڈبل سنچریاں شامل تھیں۔ انہوں نے ہندوستان کے خلاف نہ صرف بلے کے ساتھ بلکہ گیند سے بھی عمدہ کارکردگی کا مظاہرہ کیا۔ روٹ نے تین میچوں میں 333 رنز بنائے اور چھ وکٹیں لیں۔ روٹ نے پہلے ٹیسٹ میں 218 رنز بنائے تھے، جس کی وجہ سے انگلینڈ ٹیم نے بھارت کو شکست دی۔
- یہ بھی پڑھیں:-
- بھارتی خواتین ہاکی ٹیم کی مسلسل تیسری شکست
ویسٹ انڈیز کے کائل میئرز نے اپنے پہلے ٹیسٹ میں بنگلہ دیش کے خلاف میچ ونر 210 رن بنائے تھے اور پہلے ٹیسٹ میں ٹیم کی جیت میں اہم کردار ادا کیا تھا۔ بیومونٹ نے نیوزی لینڈ کے خلاف ون ڈے سیریز میں تینوں میچوں میں نصف سنچری اسکور کی اور ٹیم کو سیریز جیتنے میں مدد دینے میں اہم کردار ادا کیا۔ انہوں نے اس سیریز میں 231 رنز بنائے تھے۔
ہالیڈے نے بھی انگلینڈ کے خلاف عمدہ کارکردگی کا مظاہرہ کیا اور سیریز میں 110 رنز بنائے اور دو وکٹیں حاصل کیں۔ اسکائیور نے سیریز میں 96 رنز بنائے اور پانچ وکٹیں حاصل کیں۔ انگلینڈ اور نیوزی لینڈ کے مابین ون ڈے سیریز میں اسکائیور سب سے زیادہ وکٹ لینے والی کھلاڑی تھی۔
