نیوزی لینڈ کی نگاہیں سرفہرست مقام پر

سری لنکا کے خلاف 14 اگست سے شروع ہونے والی دو ٹیسٹ میچز کی سیریز میں اگر نیوزی لینڈ ٹیم 0-2 سے جیت جاتی ہے تو وہ ٹیسٹ درجہ بندی میں بھارت کو ہراکر کر پہلے نمبر پر پہنچ جائے گی۔

عالمی کپ کے سیمی فائنل میں انگلینڈ کے خلاف دل سوز شکست کے ٹھیک ایک ماہ بعد 14 اگست سے سری لنکا کے خلاف شروع ہونے والی دو ٹیسٹ میچز کی سیریز میں نیوزی لینڈ کے پاس ٹیسٹ درجہ بندی میں پہلے مقام پر قابض ہونے کا سنہری موقع ہے۔

آئی سی سی ٹیسٹ درجہ بندی میں فی الحال بھارت 113 پوائنٹس کے ساتھ پہلے جبکہ کیوی ٹیم 109 پوائنٹس کے ساتھ دوسرے مقام پر ہے اور اگر نیوزی لینڈ ٹیم سری لنکا کے خلاف سیریز پر 0-2 سے قبضہ کرتی ہے تو وہ بھارت کو پیچھے چھوڑتے ہوئے سرفہرست مقام پر پہنچ جائے گی۔

واضح رہے کہ دو برسوں پر محیط آئی سی سی ٹیسٹ چیمپیئن شپ شروع ہونے کی وجہ سے درجہ بندی کافی اہمیت رکھتی ہے کیوں کہ ٹیسٹ چیمپیئن شپ کے اختتام پر سرفہرست دو ٹیموں کے مابین ہی فائنل مقابلہ کھیلا جائے گا۔