کھیل کے میدان اور ڈریسنگ روم میں لکشمی رتن شکلا اور منوج تیواری کی رقابت سے سب واقف ہیں، لیکن ایسا لگ رہا ہے کہ یہ رقابت اب سیاست کے میدان میں بھی نظر آئے گی۔ حال ہی میں ترنمول کانگریس کی حکومت میں جونیر منسٹر رہے لکشمی رتن شکلا نے پارٹی کے تمام عہدے اور وزارت سے استعفیٰ دے دیا تھا۔ ترنمول کانگریس نے بھی اب لگتا ہے اس کے متبادل کے طور پر منوج تیواری کو ڈھونڈ لیا ہے۔
ذرائع کے مطابق بدھ کے روز وزیر اعلیٰ ممتا بنرجی کے عوامی جلسے کے درمیان ہی ترنمول کانگریس میں منوج تیواری شمولیت اختیار کر سکتے ہیں۔گرچہ اس سلسلے میں بنگال ٹیم کے سابق کھلاڑی کی طرف سے کوئی رد عمل سامنے نہیں آیا ہے۔ ان کے علاوہ تین فٹ بال کھلاڑیوں کے بھی اسی دن ترنمول کانگریس میں شامل ہونے کی خبریں ہیں، جن میں مانس بھٹاچاریہ، بدیس باسو اور شومک دتا شامل ہیں۔ مانس اور بدیس کو متعدد بار ترنمول کانگریس کے جلسوں میں بھی دیکھا جا چکا ہے۔
