توکتے طوفان سے متاثرہ ممبئی کے ساحلی علاقوں کا دورہ کرنے کے بعد کابینی وزیر اسلم شیخ نے طوفان سے پالگھر ضلع کے متاثرہ علاقوں کا دورہ کیا اور ماہی گیروں کو ریاستی حکومت کی جانب سے ہر ممکن مدد کی یقین دہانی کرائی۔
اس دوران اسلم شیخ نے کہا کہ اس سمندری طوفان سے ماہی گیر شدید متاثر ہوئے ہیں لہٰذا ان کی روزی روٹی کے اس نقصان کی تلافی کرنے کی حکومت کی جانب سے ہر ممکن کوششں کی جائیں گی۔
اسلم شیخ نے مزید کہا کہ بحر عرب میں آئے سمندری طوفان توکتے نے ریاست مہاراشٹر کو کافی نقصان پہنچایا ہے، ایک طرف جہاں اس طوفان سے روز مرہ کی زندگی بری طرح متاثر ہوئی تو وہیں اس طوفان نے مہاراشٹر کے ماہی گیروں کو سب سے زیادہ نقصان پہنچا ہے۔
ماہی گیروں کی کشتیوں کے ساتھ ساتھ ساحلوں پر واقع ان کے مکانات کو بھی کافی نقصان پہنچا ہے اس لیے حکومت کی جانب سے ماہی گیروں کے نقصانات کا جائزہ لینے کے بعد اُنہیں معاوضہ دینے کا کام کیا جائے گا۔
اسلم شیخ نے پالگھر تعلقہ کے دہی علاقوں مربے، ٹیمبو، اسلی، بھڈوال، کورے وغیرہ گاؤں کا دورہ کیا اور نقصانات کا جائزہ لیتے ہوئے ماہی گیروں سے ملاقات بھی کی۔
اس موقع پر مہاراشٹر کانگریس کے صدر نانا پٹولے، رکن پارلیمنٹ راجندر گاوت، سابق رکن پارلیمنٹ حسین دلوائی اور فشریز محکمہ کے افسران موجود تھے۔
