نئی دہلی: پانچ ماہ سے کووِڈ۔19 وبا کے سبب خستہ حال گاڑیوں کی صنعت کے لیے اگست کا مہینہ قدرے راحت رساں گزرا۔ مسافر گاڑیوں کی تھوک فروخت میں 14 فیصد اور دو پہیہ گاڑیوں کی فروخت میں تین فیصد کا اضافہ درج کیا گیا ۔
گاڑی بنانے والی کمپنیوں کی تنظیم (سیام) کی جانب سے جاری اعداد و شمار کے مطابق اگست میں مسافر گاڑیوں کی گھریلو فروخت ایک برس پہلے کے مقابلے 14.16 فیصد بڑھ کر 2,15,916 پر پہنچ گئی۔ گذشتہ برس اگست میں یہ اعداد و شمار 1,89,129 تھے۔ اس میں کاروں کی فروخت 14.13 فیصد بڑھ کر 1,24,715 یونٹز، قابل استعمال گاڑیوں کی فروخت 15.54 فیصد بڑھ کر 81,842 یونٹز اور وین کی فروخت 3.82 فیصد کے اضافے کے ساتھ 9,359 یونٹز رہی۔
گھریلو بازار میں رواں برس اگست میں کل 15,59,665 دو پہیہ گاڑیاں فروخت ہوئیں۔ اگست 2019 میں یہ اعداد و شمار 15,14,196 یونٹز تھے۔ اس میں موٹر سائیکل کی فروخت 10.13 فیصد بڑھ کر 10,32,476 پر پہنچ گئی جبکہ اسکوٹر کی فروخت 12.30 فیصد کم ہو کر 4,56,848 رہ گئی۔ موپیڈ کی فروخت 25.65 فیصد بڑھ کر 70,126 یونٹ پر پہنچ گئی۔ علاوہ ازیں 215 الیکٹرک گاڑیاں بھی فروخت ہوئیں۔
رواں مالی برس میں اپریل سے اگست تک مسافر گاڑیوں کی فروخت میں 49.41 فیصد کی کمی درج کی گئی ہے۔ گذشتہ برس کی اسی مدت میں 10,91,928 مسافر گاڑیاں فروخت ہوئی تھیں جن کی تعداد کم ہو کر 5,52,429 رہ گئی ہے۔ اسی مدت میں دو پہیہ گاڑیوں کی فروخت 48.57 فیصد کم ہو کر 41,34,132 یونٹز اور تین پہیہ گاڑیوں کی 84.86 فیصد کم ہو کر 40,022 یونٹز پر رہی۔
گاڑی کی کمپنیوں کو اگست میں برآمد (ایکسپورٹ) کے محاذ پر کساد بازاری کا سامنا رہا۔ کئی ملکوں میں لاک ڈاؤن اور مالی سرگرمیوں پر پابندی عائد ہونے کے سبب گاڑیوں کی (برآمد) 45.17 فیصد کم ہو کر 38,116 یونٹ پر رہ گئی۔ گذشتہ برس اگست میں 69,516 مسافر گاڑیوں کی برآمد کی گئی تھی۔
دو پہیہ گاڑیوں کی برآمد 14.23 فیصد کی گراوٹ کے ساتھ 2,55,842 یونٹ پر رہی۔ موٹر سائیکل کی برآمد میں 7.08 فیصد اور اسکوٹر کے ایکسپورٹ میں 62.89 فیصد کی تخفیف درج کی گئی۔ تین پہیہ گاڑیوں کی برآمد 13.61 فیصد کم ہو کر 39,636 یونٹز پر آ گئی۔
