'راجستھان میں یوم عاشورا پر حکومتی گائیڈ لائن کے مطابق عزاداری کا اہتمام ہوگا'

ریاست راجستھان میں یوم عاشورہ آج بروز جمعہ منایا جائے گا۔ اس حوالے سے تیاریاں بھی زوروں پر چل رہی ہے۔ وہیں، جمعرات کو یوم شہادت منایا گیا۔

دارالحکومت جے پور میں حکومتی گائیڈ لائن پر عمل کرتے ہوئے مختلف مقامات پر متعدد محفلوں کا اہتمام کیا گیا۔ گھروں میں فاتحہ خوانی کا دور چلا، یا حسین یا حسین کی صدائیں گونجتی ہوئی سنائی دیں۔ کربلا کی درگاہ میں الگ ہی منظر نظر آیا۔ عقیدت مند اپنی عقیدت کا اظہار کرنے کے لیے کربلا کی درگاہ پہنچے۔

شیعہ برادری کے لوگ ماتم مناتے ہوئے نظر آئے۔ جگہ جگہ پر شربت اور پانی کی سبیلیں لگائی گئیں۔ آج یوم شہادت کے موقع پر جو تعزیہ امام باڑوں سے باہر نکلا کرتے تھے، وہ حکومتی پابندی کی وجہ سے دوسری بار باہر نہیں نکالے گئے۔

وہیں، حکومتی گائیڈ لائن پر عمل کرانے کے لیے پولیس کو بھی تعینات کیا گیا تھا۔ پولیس محکمے کے تمام اعلیٰ افسران الگ الگ علاقوں میں جائزہ لیتے ہوئے نظر آئے۔ ان افسران کے ساتھ سماجی تنظیموں کے ذمہ داران بھی انتظامات کو بہترین بناتے ہوئے نظر آئے۔

واضح رہے کہ آج یوم عاشورہ کے روز جو تعزیہ کا جلوس نکالا جاتا تھا، وہ جلوس کورونا وبا کے مدنظر دوسری بار نہیں نکالا جائے گا۔ پورے معاملے کو لے کر کربلا علاقہ کے مقامی رہنما عبدالغفار خان کا کہنا ہے کہ حکومتی ایڈوائزری کے مطابق یہاں کربلا علاقہ میں عزاداری کا اہتمام کیا جائے گا۔