اترپردیش کے وزیراعلیٰ یوگی آدتیہ ناتھ نے کہا کہ وزیر اعظم نریندر مودی 14 ستمبر کو ملک کے مشہور مجاہد آزادی راجہ مہندر پرتاپ کے نام پر ایک ریاستی یونیورسٹی اور دفاعی راہداری کے علی گڑھ ’نوڈ‘ کا سنگ بنیاد رکھیں گے۔
سینئر ضلع عہدیداروں کے ہمراہ یہاں وزیر اعظم کے دورے کی تیاریوں کا جائزہ لیتے ہوئے وزیراعلیٰ نے کہا کہ ضلع میں زیر تعمیر مجاہدین آزادی اور ماہر تعلیم راجہ مہندر پرتاپ اسٹیٹ یونیورسٹی علی گڑھ ڈویژن کی ترقی کا محور ثابت ہوگی۔ انہوں نے بتایا کہ ایٹہ، ہاتھرس، کاس گنج اور علی گڑھ کے 400 سے زائد ڈگری کالجز یونیورسٹی سے منسلک ہوں گے۔
انہوں نے کہا کہ یہ یونیورسٹی یہاں کے نوجوانوں کے لیے جدید تعلیم اور روزگار کا مرکز بنے گی۔ انہوں نے کہا کہ پی ایم مودی 14 ستمبر کو یونیورسٹی کا سنگ بنیاد رکھیں گے، یہ علی گڑھ ڈویژن کے لیے ایک بڑا تحفہ ہوگا۔ ڈپٹی چیف منسٹر ڈاکٹر دنیش شرما نے کہا کہ دفاعی راہداری کے علی گڑھ 'نوڈ' کا سنگ بنیاد بھی وزیر اعظم رکھیں گے۔
مزید پڑھیں:۔ UP Population Policy: دو سے زائد بچوں پر متعدد اسکیمز سے محروم ہوجائیں گے، جانیے تفصیلات
وزیراعلیٰ نے کہا کہ علی گڑھ 'نوڈ' میں 200 ایکڑ اراضی دفاعی راہداری کے لیے مختص کی گئی ہے، جہاں 19 سرمایہ کار 1500 کروڑ روپے کی سرمایہ کاری کریں گے ، جو یہاں کے نوجوانوں کو بڑے پیمانے پر روزگار کے مواقع فراہم کرے گا۔ انہوں نے کہا کہ اب تک علی گڑھ کے تالے ملک اور بیرون ملک میں مشہور تھے لیکن اب دفاعی راہداری ضلع کو ایک نئی شناخت دے گی۔ اس دوران وزیراعلیٰ نے دفاعی راہداری اور راجہ مہندر پرتاپ اسٹیٹ یونیورسٹی کے مقام کا بھی معائنہ کیا۔
