نئی دہلی: یوم آئین کے موقع پر صدر جمہوریہ دروپدی مرمو نے اتوار کو سپریم کورٹ کے احاطے میں ڈاکٹر بی آر امبیڈکر کے مجسمے کی نقاب کشائی کی۔ نقاب کشائی کے بعد صدر مرمو نے مجسمہ پر گلہائے عقیدت نذر کرکے آئین کے معمار کو خراج عقیدت پیش کیا۔
اس موقع پر چیف جسٹس ڈی وائی چندر چوڑ، مرکزی وزیر مملکت برائے قانون (آزادانہ چارج) ارجن رام میگھوال، عدالت عظمیٰ کے دیگر جج، سپریم کورٹ بار ایسوسی ایشن کے عہدیدار اور دیگر معززین موجود تھے۔ سپریم کورٹ کے احاطے میں ڈاکٹر امبیڈکر کا مجسمہ نصب کرنے کا فیصلہ وکلاء کے ایک گروپ کی درخواست پر کیا گیا تھا۔
واضح رہے کہ آئین ہند کو اپنائے جانے کی یاد میں ہرسال 26 نومبر کو ملک میں یوم آئین کے طور پر منایا جاتا ہے۔ سال 1949 میں، آئین ساز اسمبلی کے ذریعہ آئین ہند کو 26 نومبر کو ہی اپنایا گیا تھا۔ مرکزی حکومت کی سماجی انصاف اور امپاورمنٹ کی وزارت نے 19 نومبر 2015 کو اعلان کیا تھا کہ ہر سال 26 نومبر کو یوم آئین کے طور پر منایا جائے گا۔
قابل ذکر ہے کہ ڈاکٹر بھیم راؤ امبیڈکر کو بھارت کا آئین ساز کہا جاتا ہے، آزادی کے بعد وہ ملک کے پہلے قانون اور انصاف کے وزیر بنے تھے۔ سال 1990 میں انہیں بھارت کے اعلیٰ ترین شہری اعزاز 'بھارت رتن' سے نوازا گیا۔ ڈاکٹر بھیم راؤ نے سنہ 1907 میں میٹرک پاس کیا اور پھر 1908 میں انہوں نے ایلفنسٹن کالج میں داخلہ لیا۔ اس کالج میں داخلہ لینے والے وہ پہلے دلت طالب علم تھے۔
اس کے بعد 1912 میں انہوں نے بامبے یونیورسٹی سے اکنامکس اور پالیٹیکل سائنس سے ڈگری حاصل کی۔ سنہ 1913 میں ایم اے کرنے کے لی وہ امریکہ چلے گئے، تب ان کی عمر محض 22 سال تھی۔ اس کے بعد 1921 میں انہوں نے لندن اسکول آف اکنامکس سے ایم اے کی ڈگری حاصل کی۔ جب بھارت کی آئین سازی ہو رہی تھی تو انہوں نے اس میں نہ صرف اہم کردار ادا کیا بلکہ آئین کو مرتب بھی کیا۔
یہ بھی پڑھیں
