امپھال: منی پور کے تھوبل ضلع میں پیر کی شام مبینہ طور پر چار افراد کو گولی مار کر ہلاک اور 14 دیگر کو زخمی کر دیا گیا۔ اس کے بعد ریاست کے پانچ اضلاع میں دوبارہ کرفیو نافذ کر دیا گیا۔ افسران نے یہ معلومات فراہم کیں۔ انہوں نے کہا کہ حملہ آوروں کی ابھی تک شناخت نہیں ہو سکی ہے۔ انہوں نے کہا کہ حملہ آوروں نے لیلونگ چنگجاو علاقے میں مقامی لوگوں کو نشانہ بناتے ہوئے فائرنگ کی۔ اس واقعے میں چار افراد کی موقع پر ہی موت ہو گئی، جب کہ 14 دیگر زخمی ہو گئے۔
حکام نے بتایا کہ زخمیوں کو اسپتال میں داخل کرایا گیا ہے۔ حملے کے بعد مشتعل مقامی لوگوں نے تین گاڑیوں کو آگ لگا دی۔ انہوں نے کہا کہ اس واقعہ کے بعد تھوبل، امپھال ایسٹ، امپھال ویسٹ اور بشنو پور اضلاع میں دوبارہ کرفیو نافذ کر دیا گیا ہے۔
وہیں وزیر اعلیٰ این بیرن سنگھ نے ایک ویڈیو بیان میں یقین دلایا کہ 'حملہ آوروں کا سراغ لگایا جا رہا ہے۔ ہم اس واقعے کو سنجیدگی سے لے رہے ہیں۔ منی پور پولیس کو ملزمان کی جلد گرفتاری کے لیے کارروائی کا حکم دے دیا گیا ہے۔ میں لوگوں سے، خاص طور پر لیلونگ کے لوگوں سے اپیل کرتا ہوں کہ وہ کسی بھی قسم کے تشدد کا سہارا لینے سے گریز کریں۔ میں آپ کو یقین دلاتا ہوں کہ ہم مجرموں کے خلاف قانون کے مطابق سخت کارروائی کریں گے، آپ حکومت کے ساتھ تعاون کریں۔
