مغربی بنگال میں منعقد ہونے والے اسمبلی انتخابات سے قبل سیاسی جماعتوں کے رہنماؤں کے درمیان لفظی جنگ اور بیان بازی کا بازار گرم ہے، بی جے پی اور ٹی ایم سی کے اعلیٰ رہنماؤں کے درمیان شدید بیان بازی ہو رہی ہے۔
حکمراں جماعت ترنمول کانگریس کے رہنما اور وزیر فرہاد حکیم نے کہا کہ بی جے پی ملک کی واحد سیاسی جماعت ہے جو دوسری پارٹیوں کے بکھرنے کی وجہ سے سنورتی ہے۔
انہوں نے کہا کہ بی جے پی دل بدل کے کھیل میں کافی ماہر ہے، بیشتر ریاستوں میں بی جے پی کی حکومت اسی کھیل کی بنیاد پر قائم ہے، انہوں نے کہا کہ 'گزشتہ ایک برس کے دوران مدھیہ پردیش، راجستھان اور مہاراشٹر میں اس کی عمدہ مثال دیکھنے کو مل چکی ہے، جہاں عوام کی منتخب حکومت کو دل بدل کے کھیل کی بدولت حکومت گرانے کی کوشش کی گئی۔'
ان کا کہنا تھا کہ 'بی جے پی ٹھیک اسی طرح کا کھیل مغربی بنگال اسمبلی انتخابات سے قبل دل بدل کی مدد سے حکومت بنانے کا خواب دیکھنے لگی ہے، لیکن یہاں اسے کامیابی ملنے سے رہی، مغربی بنگال میں بی جے پی کے پاس اپنا کوئی رہنما نہیں ہے، اور اسی وجہ سے وہ ترنمول کانگریس سمیت دوسری جماعتوں کو توڑنے کی سازش کر رہی ہے۔'
انہوں نے کہا کہ ترنمول کانگریس کی سربراہ ممتا بنرجی ایک عام کو پارٹی اور عوامی رہنما بناتی ہیں، بی جے پی کی طرح نہیں دوسروں کے گھروں میں پھوٹ ڈال کر اپنے خوابوں کا محل تعمیر کرنے کی سازش نہیں کرتی ہیں۔'
