اسمبلی الیکشن کے لیے بریلی میں پولنگ دوسرے مرحلے میں تھی اور اس دوران الیکشن میں ڈیوٹی کرنے کے بعد واپس گھر لوٹنے والے تمام سرکاری ٹیچرز اور اہلکاروں نے اپنا کووڈ ٹیسٹ کرایا ہے۔ جس میں ایک خاتون ٹیچر اور ایک طالبہ سمیت کُل چھ افراد کو کورونا مثبت پایا گیا ہے۔
اس کے بعد محکمۂ صحت نے احتیاط کے طور پر تمام افراد کو کوارنٹین ہونے کا مشورہ دیا ہے۔ حالانکہ متاثرہ افراد میں سے دو فالو اپ کیس ہیں۔
آئی ڈی ایس پی انچارج ڈاکٹر انوراگ گوتم کے مطابق شاستری نگر کی ایک ٹیچر کو کورونا سے متاثر پایا گیا ہے۔ ٹیچر نے بتایا کہ الیکشن ڈیوٹی کے بعد ان کی طبیعت خراب ہونے لگی تھی۔ احتیاطی طور پر کورونا جانچ کی گئی تو رپورٹ مثبت پائی گئی جب کہ راجیندر نگر کی ایک طالبہ کو بھی کورونا متاثر پایا گیا ہے۔
دیگر متاثرہ افراد میں سے ایک تِلہیر اور ایک مغربی فتح گنج کا رہنے والا ہے۔ دو دیگر افراد جو ماضی میں متاثر پائے گئے تھے۔ احتیاطی تدابیر کے طور پر ٹیسٹ کیا گیا تو وہ دونوں دوبارہ مثبت پائے گئے ہیں۔
