ترال: جموں و کشمیر کے کوثر بل ترال بالا میں جمعرات کی صبح بستی سے گزرنے والی ایک ترسیلی لائن اچانک گر آئی جس کے نتیجے میں ایک مقامی شہری کے چھ بھیڑ ہلاک ہوئے ہیں جب کہ ان بھیڑوں کو باغ تک لے جانے والے چرواہا بال بال اس واقعے میں بچ گیا۔ اس واقعے کے خلاف نائیک محلہ کوثر بل ترال پائین کے لوگوں نے شدید برہمی کا اظہار کرتے ہوئے بستی میں ترسیلی لائن کی مرمت کا مطالبہ کیا۔ بھیڑوں کے مالک نذیر احمد گنائی نے بتایا کہ انہوں نے جمعرات کی صبح یہاں حسب معمول اپنے بھیڑوں کو چرانے کے لئے لے گئے۔ اس دوران یہاں محکمے میں بجلی کی ترسیلی لائن گر آئی ہے جس کے نتیجے میں ان کے چھ بھیڑ موقع پر ہی ہلاک ہوگئے۔
جب کہ ان کے ساتھ جو لڑکا تھا وہ بال بال بچ گیا ہے۔ مقامی لوگوں نے اس واقعے پر شدید برہمی کا اظہار کرتے ہوئے بتایا یہاں اس وقت ہر روز بچے سکول جاتے ہیں تاہم آج بارش کی وجہ سے وہ ابھی گھروں میں ہی تھے جس کی وجہ سے ایک حادثہ ٹل گیا۔ محکمہ شیپ ہسبنڈری کے ایک عہدہ دار شبیر حسین بٹ نے بتایا کہ اطلاع موصول ہونے کے ساتھ ہی یہاں پہنچے اور یہاں ایک غریب شخص کے چھ بھیڑ مر گئے یہ شخص بھیڑ بکری پال کر ہی اپنے گھر کا گزارہ کرتا تھا۔
شبیر حسین بٹ نے بتایاکہ ہم نے اس حوالے سے باضابط طور پر نقصان کا تخمینہ اور باقی لوازمات پورے کئے جس کو محکمے کے اعلیٰ حکام تک پہنچایا جائے گا تاکہ متاثرہ شخص کوکچھ مدد کی جائے۔ بستی کے لوگوں نے محکمہ بجلی پر الزام عائد کیا ہے کہ انہوں نے ایک ہزار بار اس خستہ حال ترسیلی نظام کے بارے میں آگاہ کیا تاہم انہوں نے کوئی توجہ نہیں دی ۔
مزید پڑھیں: Stray Dog Attack لولاب میں آ وارہ کتوں کے حملوں میں سات افراد زخمی
مقامی شہریوں کے مطابق علاقے میں بجلی کا ترسیلی نظام انتہائی خستہ حال ہے اور متعلقہ حکام اس بارے میں خاموش تماشائی بنے ہوئے ہیں انہوں نے مطالبہ کيا کہ یا تو ترسیلی نظام درست کیا جائے یا بجلی کے کنکشن ہی کاٹ دیے جائیں۔ ادھر ایگزیکٹو انجینئر پی ڈی ڈی اونتی پورہ الطاف احمد نے نمائندے کو فون پر بتایا کہ کہ دراصل یہ ایل ٹی لائن کا کنڈکٹر گر گیا۔ جس کی وجہ سے یہ حادثہ پیش آیا ہے۔انہوں نے بتایا ترال میں تعنیات افسران کو اس حوالے سے جائے حادثہ پر روانہ کیا گیا ہے اور عوامی شکایت کا فوری ازالہ کیا جائے گا۔
