JK Police SI Recruitment Probe : سب انسپکٹر بھرتی میں تحقیقات خوش آئند، فاروق ترالی

ترال: اسٹیزن کونسل ترال نے جموں و کشمیر پولیس محکمہ میں سب انسپکٹر کے عہدوں کے لیے حال ہی میں اعلان کردہ نتائج میں مبینہ بے ضابطگیوں پر شدید تشویش ظاہر کی۔ اسی کے ساتھ انہوں نے ایل جی انتظامیہ کی جانب سے جانچ کا حکم دینے پر اطمینان کا اظہار کیا۔ Farooq Trali on SI Recruitment Probe

ای ٹی وی بھارت کے ساتھ بات چیت میں اسٹیزن کونسل ترال کے چیئرمین فاروق ترالی نے بتایا کہ حسب روایت پولیس میں ایسی بھرتیوں کے لیے پولیس ریکروٹمنٹ بورڈ ہی امتحانات منعقد کرتا تھا لیکن ایل جی انتظامیہ نے اس روایت کو ختم کر دیا تھا۔ انہوں نے کہا کہ جب اس ریکروٹمنٹ کی لسٹ منظر عام پر آئی تو اس میں مبینہ بے ضابطگیوں کے خلاف سماجی حلقوں میں شدید ناراضگی پیدا ہوئی کیونکہ بیشتر نوجوان جو منتخب ہوئے وہ ایک ہی خطے کے ساتھ وابستہ ہیں۔

انہوں نے کہا کہ بیشتر امیداورں نے اس نتیجے میں مجموعی بے ضابطگیوں کا الزام عائد کیا ہے اور امیدواروں کے مطابق ایسا لگتا ہے کہ نتائج میرٹ کی تحت نہیں بلکہ بااثر امیدواروں کو بے ضابطگیوں کے تحت دیا گیا۔ امیدواروں کی طرف سے یہ الزامات ایسے وقت میں لگائے گئے ہیں جب جموں و کشمیر میں بے روزگاری کا گراف نمایاں طور پر بلند ہو چکا ہے۔ فاروق ترالی نے اس لسٹ میں ملوث افراد کے خلاف ضابطے کے تحت کارروائی کا مطالبہ کیا۔