نئی دہلی: منی پور کے لوگوں کی بڑی تعداد نے بدھ کو دہلی میں وزیر داخلہ امت شاہ کی رہائش گاہ کے باہر مظاہرہ کیا، تاہم دہلی پولیس نے بیریکیڈ لگا کر مظاہرین کو روکنے کی کوشش کی ہے۔ واضح رہے کہ حال ہی میں امت شاہ نے منی پور کا دورہ کیا تھا۔ کوکی برادری کے لوگ منی پور میں ہونے والے تشدد کو لے کر ناراض ہیں۔ منی پور میں تشدد کے مسلسل واقعات کے بعد بھی حالات معمول پر نہیں آرہے ہیں۔
واضح رہے کہ 3 مئی کو منی پور میں تشدد کے بعد وزیر داخلہ امت شاہ نے ریاست کا دورہ کیا تھا۔ احتجاج کرنے والے لوگوں کا کہنا ہے کہ امت شاہ نے کہا تھا کہ ریاست میں امن لوٹ آئے گا، اس لیے ہم ان سے ملنے آئے ہیں۔ کوکی برادری کے خلاف آج بھی پرتشدد کے واقعات میں اضافہ ہو رہا ہے، اسی لیے امن کا مطالبہ کرتے ہوئے ہم وزیر داخلہ سے پرامن طریقے سے ملنے آئے ہیں۔
مزید پڑھیں: Indian Christian Unity Forum Protest منی پور تشدد کے خلاف بنگلور میں احتجاج
پولیس افسران نے مظاہرین کو سمجھایا اور وزیر داخلہ تک ان کی بات پہنچانے کی یقین دہانی کرائی۔ مظاہرین پوسٹر اٹھائے امیت شاہ کے گھر کے باہر کھڑے تھے۔ مظاہرین کا کہنا ہے کہ ہمارا پیغام وزیر داخلہ کو بھیجا گیا ہے۔ ہمیں امید ہے کہ وزیر داخلہ ہماری بات سنیں گے اور ہم سے ملاقات کریں گے۔ ہمارا مطالبہ ہے کہ کوکی برادری کے لوگوں کی آواز سنی جائے۔ واضح رہے کہ منی پور میں کوکی اور میتی کمیونٹی کے درمیان تشدد ہوا ہے۔ ایک ماہ سے زائد عرصے سے منی پور میں نسلی تشدد کی وجہ سے کشیدگی کی صورتحال ہے۔ اس تشدد میں 80 سے زائد افراد ہلاک ہو چکے ہیں۔ ہزاروں لوگ بے گھر ہو چکے ہیں۔ کئی ہزار گھر جل چکے ہیں۔
