ڈائریکٹر ہیلتھ سروسز کشمیر ڈاکٹر مشتاق احمد راتھر نے آج بڈگام کے بوائز ہائر سیکنڈری اسکول چڈورہ میں آیوشمان بھارت صحت میلہ کا افتتاح کیا۔ اس موقع پر انہوں نے کہا کہ ان ہیلتھ میلوں کا مقصد لوگوں کو صحت کی مختلف اسکیموں کے بارے میں آگاہ کرنا اور انہیں ان کی دہلیز پر صحت کی بہترین سہولیات فراہم کرنا ہے۔ انہوں نے کہا کہ صحت سے متعلق اسکیموں کے فوائد ہر گھر تک پہنچانے کو یقینی بنانے کی کوششیں جاری ہیں۔
انہوں نے کہا کہ آیوشمان بھارت اسکیم کے ذریعے ہر عام شہری کو نہ صرف سرکاری اسپتالوں بلکہ پرائیویٹ اسپتالوں میں بھی صحت کی بہترین سہولیات مفت حاصل کرنے کا اختیار دیا گیا ہے۔ ان پروگراموں کے ذریعے ہم صحت کی اسکیم کے فوائد ہر گھر تک پہنچانے کو یقینی بنایا جاتا ہے۔ ڈائرکٹر نے مزید لوگوں سے اپیل کی کہ وہ گولڈن کارڈ کے لیے اندراج کریں، جن اوشدھی کی خدمات حاصل کریں اور صحت کی دیگر اسکیموں سے استفادہ حاصل کریں۔
اس دوران محکمہ صحت بڈگام نے ایک روزہ ہیلتھ کیمپ کا انعقاد کیا جس میں سینکڑوں مریضوں نے مفت کنسلٹنسی اور مفت ادویات حاصل کیں جبکہ اس موقع پر سینئر ڈاکٹرز، پیرا میڈیکس کے عملے اور ٹیکنیشنز نے گائنی، ای این ٹی، آئی، چائلڈ ہیلتھ سپیشلٹی، سکن، جنرل میڈیسن، آرتھو، جنرل سرجری اور ڈینٹل سے متعلق سینکڑوں مریضوں کا ہیلتھ چیک اپ کیا۔ مریضوں نے فرسٹ ایڈ کاؤنٹر پر مفت ادویات، بچوں کی ویکسینیشن کا بھی فائدہ اٹھایا، جبکہ فیملی ویلفیئر، آیوش، آر بی ایس کے، آر این ٹی سی پی جیسی سہولیات بھی عام لوگوں کو فراہم کی گئیں۔
ڈائریکٹر نے تمام سہولیات کا معائنہ کیا اور عملے اور مریضوں سے بات چیت کی اور صحت کی سہولیات کے بارے میں دریافت کیا۔ اس موقع پر سی ایم او بڈگام ڈاکٹر تجمل حسین خان نے کہا کہ یہ صحت میلے ضلع کے ہر میڈیکل بلاک میں منعقد کیے جائیں گے تاکہ ہمارے صحت کی دیکھ بھال کے نظام کو فروغ دیا جا سکے اور لوگوں کو ان کی صحت اور علاج کی سرکاری سکیموں کے بارے میں آگاہ کیا جا سکے۔
انہوں نے کہا کہ میلے میں صبح سے ہی لوگوں کی آمد کا سلسلہ شروع ہو گیا ہے کیونکہ یہاں مریض مفت ادویات کے ساتھ ساتھ مشاورت بھی حاصل کرتے ہیں۔ ایس ڈی ایم چاڈورہ شہزادہ نورالحامد نے بھی اس موقع پر خطاب کیا اور عام لوگوں کے لیے ان صحت میلوں کے انعقاد کی اہمیت پر غور کیا۔
یہ بھی پڑھیں: Public Outreach Program Budgam: بڈگام پولیس نے پبلک آؤٹ ریچ پروگرام کا اہتمام کیا
اس موقع پر طلباء کے ایک گروپ نے صحت کی دیکھ بھال کی سہولیات اور گولڈن کارڈز کے بارے میں آگاہی پیدا کرنے کے لیے مختلف ثقافتی پروگرام اور نکاد ناٹک پیش کیے۔ اس موقع پر فوڈ سیفٹی آفس بڈگام نے عام لوگوں کو فوڈ فورٹیفیکیشن اور فوڈ سیفٹی کے بارے میں بیداری فراہم کی اور بازاروں میں غیر صحت مندانہ طریقوں سے نمٹنے میں محکموں کی مدد کرنے کے بارے میں آگاہ کیا۔ آیوشمان بھارت گولڈن کارڈز رجسٹریشن، سی ایس سی اور دیگر اسٹالز جہاں مختلف اسکیموں کے تحت فائدہ اٹھانے والوں کی بیداری اور رجسٹریشن کے لیے بھی لگائے گئے ہیں۔
