کوکرناگ: سماجی جرائم کے خلاف اپنی مسلسل کوششوں میں پولیس تھانہ کوکرناگ کی پولیس پارٹی نے ایس ایچ او کوکر ناگ نثار احمد ہرّہ کی سربراہی میں ایس ڈی پی او کوکرناگ منصور ایاز کی نگرانی میں ناجائز شراب کی اسمگلنگ کی مخصوص اطلاع پر ایک گھر کی تلاشی لی اور چیکنگ پر محمد یوسف المعروف چولا ولد حسین شیخ کو گرفتار کر لیا۔ بتایا جا رہا ہے کہ مذکورہ شخص کوکرناگ کے ہلر علاقے کا رہائشی ہے، مذکورہ شخص سے شراب کی 76 بوتلیں ضبط کر لی گئی ہیں، جب کہ اس کے گھر سے 9 بوتلیں وہسکی کی اور 27500 نقدی روپیے برآمد کر لیے گئے ہیں۔
یہ بھی پڑھیں:
اس معاملے میں کوکرناگ پولیس کی جانب سے ملزم کے خلاف ایف آئی آر نمبر 12/2023 کے تحت قانون کی متعلقہ دفعات کے تحت مقدمہ درج کیا گیا، جب کہ معاملے کی مزید تفتیش جاری ہے۔ ادھر مقامی لوگوں کی جانب سے پولیس کی اس کارروائی کو کافی سراہا گیا، کوکرناگ پولیس نے تمام لوگوں سے گزارش کی ہے کہ وہ پولیس کے ساتھ ان معاملات کو لے کر اپنا تعاون کریں اور اپنے پڑوس میں غیر سماجی سرگرمیوں کے بارے میں کسی بھی قسم کی معلومات کے ساتھ آگے آئیں۔
واضح رہے کہ شراب اور دیگر نشہ آور اشیاء پر پولیس کی جانب سے سختی کی جارہی ہے۔ قبل ازیں جنوبی کشمیر کے کوکرناگ علاقے میں جموں و کشمیر پولیس نے ناکہ پر تلاشی کے دوران ایک شخص کی تحویل سے منشیات برآمد ہونے کے بعد اسے گرفتار کرکے منشیات کو بھی ضبط کر لیا تھا۔ کوکرناگ پولیس نے حراست میں لیے گئے شخص کی شناخت گوری ہانجی پورہ کے رہائشی فیاض احمد لون کے طور پر کی ہے۔ پولیس کے مطابق گرفتار کیے گئے شخص کی تحویل سے 550گرام چرس ضبط کیا گیا۔
مزید پڑھیں: بجبہاڑہ: منشیات فروشی کے الزام میں دو افراد گرفتار
اس ضمن میں کوکرناگ پولیس اسٹیشن نے کیس درج کرکے مزید کارروائی شروع کر دی تھی۔ قابل ذکر ہے کہ ایک عرصہ کے دوران ضلع اننت ناگ کے سنگم، بجبہاڑہ اور کھنہ بل کے بشمول کئی علاقوں میں ناکہ بندی اور تلاشی کے دوران متعدد منشیات فروشوں کو گرفتار کیا گیا تھا۔ وادیٔ کشمیر میں منشیات کے بڑھتے رجحان پر عوامی حلقوں میں کافی تشویش پیدا ہو گئی ہے، جب کہ جموں و کشمیر پولیس نے منشیات کا قلع قمع کرنے میں عوام سے تعاون کی اپیل کی ہے۔
