یوپی کے مظفر نگر میں آج صبح دو اسکولی گاڑیوں کے درمیان تصادمTwo School Bus Collided میں ایک درجن کے قریب بچے اور ڈرائیور شدید زخمی ہوگئے۔ اس دردناک حادثے کی وجہ دھند کی چادر بتائی جارہی ہے جب کہ لوگوں کا کہنا ہے کہ اسکول کی گاڑیوں کی تیز رفتاری کے باعث دونوں گاڑیاں آپس میں ٹکرا گئیں، جس کی وجہ سے یہ واقعہ پیش آیا۔حادثے کی اطلاع پر پہنچی مقامی پولیس نے تمام زخمی بچوں اور ڈرائیوروں کو لے کر ضلع اسپتال پہنچایا، جہاں چار بچوں کی تشویشناک حالت کو دیکھتے ہوئے میرٹھ ریفر کر دیا گیا، ساتھ ہی بچوں کے والدین کو بھی اطلاع دے دی گئی ہے۔
واضح رہےکہ آج صبح آٹھ بجے مظفرنگر کے شہر کوتوالی علاقے میں شاملی روڈ پر دو اسکول کی گاڑیاں آپس میں ٹکرا گئیں، جس میں ایک درجن سے زائد بچے زخمی ہوگئے۔ ٹکر اتنی شدید تھی کہ گاڑیاں ایک دوسرے کے اوپر چڑھ گئی۔
موقع پر پہنچی پولیس نے کرین کی مدد سے دونوں گاڑیوں کو الگ کیا اور زخمی بچوں کو نکال کر ضلع اسپتال لے گئی جہاں چاروں بچوں کی حالت نازک بتائی گئی۔
پولیس کے مطابق گوینکا پبلک اسکول اور رویندر ناتھ پبلک اسکول کی بسیں آج صبح طلباء کو گھروں سے اسکول لے جارہی تھیں کہ شاملی روڈ پر اسکول کی دونوں گاڑیاں آپس میں ٹکرا گئیں جس میں ڈرائیور کے ساتھ ساتھ اسکول کے بچے بھی زخمی ہونے والے چار بچوں کی حالت نازک ہے اور انہیں میرٹھ ہائر سنٹر ریفر کر دیا گیا ہے۔یہ ٹکر اسکولی منی بس اور اسکول وین کے درمیان ہوئی۔
