جموں وکشمیر کے بانڈی پورہ میں بین الاقوامی اولمپک دن منایا گیا۔ بانڈی پورہ ضلع انتظامیہ نے جمعرات کو منی سیکرٹریٹ بانڈی پورہ میں علی اسپورٹس اکیڈمی کے اشتراک سے بین الاقوامی اولمپک دن منایا۔تقریب کی صدارت ڈپٹی کمشنر بانڈی پورہ ڈاکٹر اویس احمد نے کی۔ International Olympic Day Celebrated in Bandipora
اس دوران انہوں نے کہا کہ اس دن کو منانے کا مقصد اولمپکس کے خیال کو فروغ دینا اور بچوں میں ایتھلیٹک کھیل کی طرف دلچسپی پیدا کرنا ہے۔ تقریب میں جوائنٹ ڈائریکٹر پلاننگ امتیاز احمد، پدم شری ایوارڈ یافتہ فیصل علی ڈار، علی اسپورٹس اکیڈمی کے طلباء اور ضلعی انتظامیہ کے افسران نے بھی شرکت کی۔
اس موقع پر ڈی سی نے بچوں سے بات چیت کی جنہوں نے ڈپٹی کمشنر کے ساتھ اولمپکس کے حوالے سے اپنے خیالات کا اظہار کیا۔ ڈاکٹر اویس نے کہا کہ انتظامیہ کھیلوں کو فروغ دینے کے لیے ہر ممکن اقدام کر رہی ہے اور ایتھلیٹکس پر خصوصی توجہ دی جائے گی جس سے نوجوان نسل کو نہ صرف جسمانی اور ذہنی طور پر فٹ رکھنے میں مدد ملے گی بلکہ انہیں کھیلوں کو کیریئر کے طور پر منتخب کرنے میں مدد ملے گی۔ انہوں نے ضلع میں کھیلوں کی سرگرمیوں کو تیز کرنے اور نوجوان نسل کی تربیت کے علاوہ کھیلوں کو کیریئر کے طور پر پیش کرنے میں علی سپورٹس اکیڈمی کی کاوشوں کو سراہا۔
