لکھنؤ: لکھنؤ کی منزہ فاطمہ نے 96 فیصد نمبر حاصل کرتے ہوئے امتیازی مقام حاصل کیا، منزہ نے آئی سی ایس ای بورڈ کی دہم کلاس میں یہ کامیابی حاصل کی۔ اس موقع پر منزہ فاطمہ نے ای ٹی وی بھارت سے بات چیت کرتے ہوئے کہا کہ میں ابتدائی دنوں سے ہی مسلسل محنت کر رہی تھی۔ میرے والدین اور اہل خانہ اساتذہ پوری لگن اور جدوجہد کے ساتھ ہماری تعلیم میں تعاون کر رہے تھے۔ یہی وجہ ہے کہ آج مجھے نمایاں نمبرات سے کامیابی ملی اور اس پر میں بے حد خوش ہوں۔
یہ بھی پڑھیں:
منزہ فاطمہ لکھنؤ کے معروف لوریٹو کالج میں دسویں جماعت کی طالبہ ہیں۔ انہوں نے بتایا کہ دوران تعلیم وہ گزشتہ اسباق کو یاد کرنے پر زور دیتی تھی۔ امتحان کے دوران صرف نظر ثانی کیا۔ اس کے علاوہ سوشل میڈیا سے بھی مسلسل جڑی رہی۔ جب پڑھنے کے اوقات ہوتے تھے تو موبائل دور رکھتی تھی۔ انہوں نے کہا کہ تاریخ میں 100 نمبر میں سے 100 حاصل ہوئے ہیں۔ جب کہ فزکس میں 98 نمبر حاصل ہوئے۔
انہوں نے کہا کہ میں مستقبل میں ایک بہترین ڈاکٹر بننا چاہتی ہوں۔ تاکہ سماج کی خدمت کر سکوں۔ انہوں نے کہا کہ بھارت کو ڈاکٹروں کی بے حد ضرورت ہے۔ ہمارے ملک میں طرح طرح کی بیماریاں پھیل رہی ہیں۔ ان بیماریوں سے عوام کو نجات دلانے کے لیے ایک بہترین ڈاکٹر بننا چاہتی ہوں۔ انہوں نے بتایا کہ ہمارے کامیابی کا سہرا ہمارے والدین اور ٹیچرز کو جاتا ہے۔
