ممبئی: بلڈانہ پولس اسٹیشن میں متین شیخ نام کے رکشہ ڈرائیور کی بے رحمانہ پٹائی کے بعد اب ہیڈ کانسٹیبل نند کمار تیواری کو برخواست کرنے کا مطالبہ اور متاثرہ رکشہ ڈرائیور کو معاوضہ اور خاطی پولس اہلکار کے خلاف قانونی کارروائی کی مانگ نے شدت اختیار کرلی ہے۔ یہاں رکن اسمبلی ابو عاصم اعظمی نے سوشل میڈیا پر وائرل ویڈیو کے بعد وزیر اعلیٰ، وزیر داخلہ اور ڈی جی پی رشمی شکلا سے تحریری طور پر خط لکھ کر کارروائی کا مطالبہ کیا ہے۔
یہ بھی پڑھیں:
انہوں نے کہا کہ رکشہ ڈرائیور اور نروتم شیکھر کی فیملی میں تنازعہ تھا۔ اس تنازعہ کے تصفیہ کے لیے فریقین کو پولس اسٹیشن بلایا گیا اور معاملہ کا تصفیہ ہوچکا تو اس کے بعد شیکھر نے پولس کانسٹیبل کو پولس اسٹیشن کے باہر بلا کر اس کے کان میں کچھ کہا تو پولس والے نے متین کو رکنے کے لیے کہا اور اندر جاکر چمڑے کا بیلٹ نکال کر اسے کمرے میں لے جا کر بری طرح زدوکوب کیا۔ جس کا ویڈیو وائرل ہونے پر پولس نے خانہ پری کرتے ہوئے کانسٹیبل کو معطل کر دیا۔ جب کہ کانسٹیبل کو برخواست کیا جانا چاہیے اور متاثرہ کو معاوضہ دے کر سرکار اس پر قانونی کارروائی کرے۔ کیونکہ اس قسم کی ذہنیت کا خاتمہ اس وقت ہی ممکن ہے جب ایسے عناصر پر کارروائی ہو گی۔ اعظمی نے اس مسئلہ پر تشویش کا اظہار کرتے ہوئے پولس کے رویہ پر بھی سوال اٹھایا ہے۔
