لکھنؤ:ایکانا کی مشکل پچ پر لکھنؤ کی طرح ممبئی کے گیند بازوں نے بھی شاندار کارکردگی کا مظاہرہ کیا اور 144 رنز کے چھوٹے اسکور کا دفاع کرنے کی ہمت دکھائی جس کی وجہ سے 45 ہزار شائقین کو گیند اور بلے کے درمیان دلچسپ مقابلہ دیکھنے کو ملا۔
اپنا ڈیبیو میچ کھیل رہے ارشین کلکرنی پہلی ہی گیند پر کھاتہ کھولے بغیر آؤٹ ہوگئے جس کے بعد اسٹائنس نے کپتان کا بہت اچھا ساتھ دیا اور 45 گیندوں کی اپنی نصف سنچری اننگز میں سات چوکے اور دو چھکے لگا کر اپنی ٹیم کو جدو جہد میں بنائے رکھا اگرچہ ان کی اس کوشش میں کپتان کے ایل راہل اور ہڈا ہی ساتھ دے سکے۔ مڈل آرڈر میں تجربہ کار نکولس پورن (ناٹ آؤٹ 14) نے بعدکے بلے بازوں کی مدد سے ٹیم کو جیت دلانے میں اہم کردار ادا کیا۔
بلے سے ناکام رہنے والے ممبئی کے کپتان ہاردک پانڈیا نے دو وکٹ لے کر اپنی ٹیم کی جیت کی امیدیں بڑھا دیں لیکن ان کی ٹیم معمولی اسکور بچانے میں ناکام رہی۔اس سے قبل ایشان کشن (32) اور نہال بڈھیرا (46) کی مشکل حالات میں کھیلی گئی کارآمد اننگز کی مدد سے ممبئی نے انڈین پریمیئر لیگ (آئی پی ایل) کے 48ویں میچ میں منگل کو میزبان لکھنؤ کے خلاف سات وکٹ پر 144 رن بنائے۔
اکانا اسٹیڈیم میں ٹاس ہار کر پہلے بیٹنگ کرنے آئی ممبئی کی شروعات اس وقت مایوس کن رہی جب پہلے پاور پلے میں لکھنؤ کے گیند بازوں نے روہت شرما (4)، سوریہ کمار یادو (10)، تلک ورما (7) اور کپتان ہاردک پانڈیا (0) کے وکٹ سستے میں سمیٹ دیئے اور چھ اوور کے بعد ممبئی کاا سکور چار وکٹوں پر 28 رن ہوگیا۔
مشکل وقت میں اوپنر ایشان کشن نے نئے بلے باز نہال بڈھیرا کے ساتھ مل کر اننگز کو آگے بڑھایا اور پانچویں وکٹ کے لیے اہم 53 رن بنائے۔ اس دوران اننگز کے نویں اوور میں مینک یادو کی گیند پر ایشان کا کیچ ٹرنر گرا دیا۔ اس وقت ایشان صرف سات رن بنا سکے تھے۔ اننگز کے 14ویں اوور میں روی وشنوئی کی گیند پر مینک نےشارٹ تھرڈ مین پر ایشان کا کیچ لے کر ان کی جانباز اننگز کا خاتمہ کیا۔
دوسری جانب بڈھیرا نے نئے بلے باز ٹم ڈیوڈ (35) کے ساتھ ممبئی کی جدوجہد جاری رکھی اور دونوں بلے بازوں نے ٹیم کے اسکور کو 112 رن تک پہنچا دیا۔ اس دوران محسن خان نے بڈھیرا کو کلین آؤٹ کر کے مہمانوں کو بڑا دھچکا دیا۔ انہوں نے 41 گیندوں کی اپنی اننگز میں چار چوکے اور دو چھکے لگائے۔
یہ بھی پڑھیں:ٹی ٹوئنٹی ورلڈ کپ کے لیے ٹیم انڈیا کا اعلان، کے ایل راہل ٹیم سے باہر - T20 World Cup 2024
مینک یادو نے اپنے اسپیل کے آخری اوور میں نئے بلے باز محمد نبی کو اپنا پہلا شکار بنایا لیکن اس کے بعد پٹھوں میں کھچاؤ کی وجہ سے مینک مزید بالنگ نہیں کر سکے اور انہیں میدان سے باہر جانا پڑا۔لکھنؤ کی جانب سے محسن خان 36 رن کے عوض دو وکٹ لے کر کامیاب ترین بالر ثابت ہوئے جبکہ مارکس اسٹائنس، روی وشنوئی، مینک یادو اور نوین الحق نے ایک ایک وکٹ حاصل کیا۔ تلک ورما روی وشنوئی کے براہ راست تھرو کی وجہ سے رن آؤٹ ہوئے۔
یواین آئی
