پلوامہ میں نئی ریلوے لائن کے نقشہ پر احتجاج - jammu srinagar railway project

پلوامہ: مرکزی حکومت نے حال ہی میں وادی میں نئے ریل لائن پروجیکٹوں کو بقیہ اضلاع کو جموں سرینگر ریلوے پروجیکٹ سے جوڑنے کی منظوری دی ہے، لیکن مختلف اضلاع کے لوگ اس نئے ریل لائن پروجیکٹوں کی تعمیر کی مخالفت کر رہے ہیں۔ کیونکہ ان کے مطابق اس منصوبے سے ان علاقوں میں زرعی اور باغبانی کا شعبہ ختم ہو جائے گا۔
ضلع پلوامہ کے نیلورہ علاقے کے لوگوں نے ایک زبردست احتجاجی مظاہرہ کیا اور اس علاقے کے باغ اور کھیتوں سے گزرنے والی نئی ریلوے لائن منصوبے کو منسوخ کرنے کا مطالبہ کیا۔ واضح رہے کہ ضلع کے مختلف علاقوں اس ریل لائن کی تعمیر انجام دی جا رہی ہے۔ احتجاج میں شامل لوگ ایک ہی مطالبہ کر رہے ہیں کہ ریلوے لائن کے اس پروجیکٹ کو منسوخ کیا جائے۔ اس سلسلے میں منظور احمد نے بات کرتے ہوئے کہا کہ کئی خاندانوں کی آمدنی کا بنیادی ذریعہ زراعت ہے اور نئی ریل لائن سے ان کی آمدنی کو ختم کردے گی۔

وہیں بشیر احمد بٹ نے کہا کہ یہ علاقہ مکمل طور پر زرعی اور باغبانی کے شعبے پر منحصر ہے اور اس علاقے میں نئی ​​ریل لائن اور ریلوے سٹیشن کی تعمیر سے علاقے میں کاشتکاری کا شعبہ تباہ ہو جائے گا جو کہ آبادی کی اکثریت کا واحد ذریعہ معاش ہے۔ مظاہرین نے وزیر اعظم، وزیر ریلوے، لیفٹیننٹ گورنر جموں و کشمیر، ڈپٹی کمشنر پلوامہ سے اپیل کی کہ وہ اس مسئلے پر توجہ مرکوز کریں تاکہ علاقے کے کاشتکاری شعبہ کو نقصان نہ پہنچے۔