اونتی پورہ: ہفتہ کی رات گوری پورہ اونتی پورہ میں بھیانک آگ کی ایک واردات میں گجر بکروال ہوسٹل کی ایک عمارت خاکستر ہوگی، جسے لاکھوں روپے مالیت کا نقصان ہوا۔ تفصیلات کے مطابق آگ اچانک رات کے گیارہ بجے ہوسٹل بلڈنگ میں ظاہر ہوئی جس کے بعد فائر سروس کی بروقت کاروائی سے آگ کو قابو پالیا گیا، تاہم آگ کی اس وادرات میں ایک عمارت پوری طرح خاکستر ہوئی اور اس میں زیر تعلیم طلاب کی کتابیں اور بسترے سمیت دیگر اسباب بھی نذر آتش ہوئے۔
عینی شاہدین نے ای ٹی وی بھارت کو بتایا کہ آگ قریباً گیارہ بجے اچانک ظاہر ہوئی،جس دوران طلبہ اور اسٹاف دوسری بلڈنگ میں نماز ادا کر رہے تھے۔ ایک طالب علم وضو کرنے کے سلسلے میں جب باہر نکلا تو اس نے عمارت میں آگ دیکھی جس کے بعد اس نے چلانا شروع کیا اور پھر برقت فائر سروس اہلکار پہنچ گئے،جنہوں نے آگ پر قابو پاکر دیگر عمارات کو بچایا ۔
ہوسٹل کے وارڈن فاروق احمد نے بتایا کہ خوش قسمتی سے کوئی جانی نقصان نہیں ہوا ہے، البتہ ایک بلڈنگ مکمل طور تباہ ہوگئی۔
مزید پڑھیں: پلوامہ میں ماڈل قبائلی رہائشی اسکول کی عمارت آگ کی نذر
اس دوران ضلع ترقیاتی کمشنر پلوامہ ڈاکٹر بشارت قیوم کی ھدایات پر آج تحصیلدار اونتی پورہ شکیل احمد نے ہوسٹل کا دورہ کر کے نقصانات کا جائزہ لیا اور اس نے فوری طور پر بسترے اور دیگر ضروری چیزوں کی ایک کھیپ ہوسٹل کو فراہم کی۔ انہوں نے میڈیا کو بتایا کہ خاکستر ہوئی بلڈنگ پر کام جلد شروع ہوگا۔
