BRS Public Meeting at Bellampalli : సింగరేణిని ముంచింది కాంగ్రెస్నే.. కాంగ్రెస్ అసమర్థత వల్లే సింగరేణి(Singareni Collieries Company)లో వాటా కోల్పోయామని బీఆర్ఎస్ అధినేత, సీఎం కేసీఆర్(CM KCR) ఆవేదన వ్యక్తం చేశారు. ఆనాడు కేంద్రంలో ఉన్న కాంగ్రెస్ ప్రభుత్వం దగ్గర అప్పులు తెచ్చి.. 49 శాతం వాటాను వారికి కట్టబెట్టారని గుర్తు చేశారు. అప్పటి నుంచి అప్పుల్లోనే ఉన్న సింగరేణి.. బీఆర్ఎస్ ప్రభుత్వం అధికారంలోకి వచ్చిన తర్వాతే లాభాల బాట పట్టిందని తెలిపారు. మంచిర్యాల జిల్లా బెల్లంపల్లి నియోజకవర్గంలో జరిగిన బీఆర్ఎస్ ప్రజా ఆశీర్వాద సభ(BRS Praja Ashirvada Sabha)లో పాల్గొన్న సీఎం కేసీఆర్.. సభను ఉద్దేశించి ప్రసంగించారు.
గత కాంగ్రెస్ ప్రభుత్వం దళితులకు అన్యాయం చేసిందని సీఎం కేసీఆర్ అన్నారు. రైతుబంధు కొనసాగాలంటే దుర్గం చిన్నయ్యను గెలిపించాలని బెల్లంపల్లి ఓటర్లను కోరారు. రైతుబంధు రూ.10వేలు నుంచి రూ.16 వేలకు పెరగాలంటే కచ్చితంగా బీఆర్ఎస్నే గెలవాలన్నారు. ఈ ఎన్నికల్లో బీఆర్ఎస్ గెలిపించకుండా వేరే పార్టీని గెలిపించి మోసపోతే.. గోసపడతామని సూచించారు. ప్రతి సింగరేణి కార్మికుడికి రూ.2.50 లక్షలు వస్తున్నాయని వివరించారు.
'బీఆర్ఎస్ పోరాటానికి భయపడే నాడు కాంగ్రెస్ ప్రత్యేక తెలంగాణ ఇచ్చింది'
"బీఆర్ఎస్ పుట్టిందే తెలంగాణ పౌరుల హక్కుల కోసం.. తెలంగాణ రాష్ట్రాన్ని సాధించడం కోసం. రాష్ట్రంలో దళితులను ఓటు బ్యాంకుగా వాడుకున్నారు కానీ దళితులకు ఒక ప్రణాళికను ఏర్పాటు చేయలేదు. కేసీఆర్ చచ్చుడో.. తెలంగాణ వచ్చుడో నినాదంతో ఉద్యమానికి వెళితే దిగొచ్చి తెలంగాణ ఇచ్చారు. సింగరేణిని ముంచింది కాంగ్రెస్నే. 134 ఏళ్ల చరిత్ర ఉన్న కంపెనీ. 100 శాతం తెలంగాణకు ఉన్న కంపెనీని ఆనాటి కాంగ్రెస్ పార్టీ నాయకుడు కేంద్రం దగ్గర డబ్బులు తెచ్చి.. కట్టలేక వారికి 49 శాతం వాటా ఇచ్చారు. కాంగ్రెస్ హయాంలో సింగరేణి నష్టాల్లో నడిచేది.. బీఆర్ఎస్ ప్రభుత్వం వచ్చిన తర్వాత లాభాలు వచ్చాయి." - కేసీఆర్, బీఆర్ఎస్ అధినేత
BRS Praja Ashirvada Sabha at Bellampalli : భూవివాదాలు ఉండకూడనే ధరణి పోర్టల్ను తీసుకువచ్చామని సీఎం కేసీఆర్ తెలిపారు. కాంగ్రెస్ హయాంలో లంచం ఇస్తేనే రిజిస్ట్రేషన్లు జరిగేవని ఆరోపించారు. ప్రస్తుతం ఎలాంటి లంచాలు ఇవ్వకుండానే అర్ధగంటలోనే రిజిస్ట్రేషన్లు అవుతున్నాయన్నారు. ధరణిని బంగాళాఖాతంలో వేస్తామని కాంగ్రెస్ నేతలు అంటున్నారని మండిపడ్డారు.
CM KCR Election Campaign : రైతులకు ఉపయోగపడే ధరణని తీసేస్తే రైతుబంధు, రైతుబీమా, ధాన్యం కొనుగోళ్ల డబ్బులు ఎలా వస్తాయని ప్రశ్నించారు. ధరణి తీసేస్తే రైతులకు భూములపై ఉన్న హక్కులు పోతాయని ఆవేదన చెందారు. ఈ పోర్టల్ను తీసేస్తే మళ్లీ దళారుల వ్యవస్థ వస్తోందని హెచ్చరించారు. అలాగే బీఆర్ఎస్ చేసిన అభివృద్ధిపై గ్రామాల్లో చర్చలు జరపాలని ప్రజలకు సూచించారు.
'గిరిజనులకు పోడు పట్టాలు ఇచ్చాం- గిరిజనులు కానివారికీ త్వరలో పట్టాలు ఇస్తాం'
