YS Sharmila comments on CM KCR: పాదయాత్రకు సంబంధించి తమ చేతిలో హైకోర్టు ఆర్డర్ ఉన్నా.. పోలీసులు అనుమతి ఇవ్వకుండా నోటీసులు ఇచ్చారని వైఎస్సాఆర్టీపీ అధ్యక్షురాలు వైఎస్ షర్మిల మండిపడ్డారు. పాదయాత్రకు వస్తున్న విశేష స్పందన చూసి.. ఓర్వలేకే ఆపాలని చూస్తున్నారని షర్మిల విమర్శించారు. లోటస్ పాండ్ లోని వైఎస్సార్టీపీ పార్టీ కార్యాలయంలో జరిగిన సమావేశంలో వైఎస్ షర్మిల మాట్లాడారు. టీఆర్ఎస్ అవినీతిని, వైఫల్యాలను ఎత్తిచూపితే తట్టుకోలేకే.. దాడులకు పాల్పడుతున్నారని ఆమె ధ్వజమెత్తారు. వ్యక్తిగత దూషణలకు ఎప్పుడూ దిగలేదని షర్మిల తెగేసి చెప్పారు. ఒక మహిళను పట్టుకొని మరదలు, వ్రతాలు అనడం వ్యక్తిగత దూషణ కాదా.. ఇప్పుడు టీఆర్ఎస్ నాయకులు చేస్తుంది ఏంటి అని ప్రశ్నించారు.
"మా పాదయాత్రే కేసీఆర్ పాలనకు అంతిమ యాత్ర అని కేసీఆర్కు స్పష్టంగా అర్థమైంది. అందుకే నా పాదయాత్రను ఎలాగైన ఆపాలని కంకణం కట్టుకున్నారు కేసీఆర్. పోలీసుల భుజాన తుపాకి పెట్టి మా పాదయాత్రను ఆపివేయాలని చూస్తున్నారు. పాదయాత్రకు అనుమతి ఇవ్వాలని హైకోర్టు చెప్పుతున్నా కూడా పోలీసులు అనుమతి ఇవ్వడం లేదు. పాదయాత్రకు అనుమతి నిరాకరిస్తూ మాకు షోకాజ్ నోటీసులు ఇచ్చారు." -వైఎస్ షర్మిల, వైఎస్సార్టీపీ అధ్యక్షురాలు
టీఆర్ఎస్ అంటే తాలిబన్ల రాష్ట్ర సమితి అని ఎద్దేవా చేశారు. 8ఏళ్లు అధికారంలో ఉన్న టీఆర్ఎస్ తప్పులను ఏ ఒక్కరు ఎత్తిచూపలేదని, ఇప్పుడు తాను ఎత్తుచూపుతున్నానన్నారు. కవిత ఒక మహిళ అయి ఉండి లిక్కర్ స్కాంలో ఉండడంపై ఆగ్రహం వ్యక్తం చేశారు. తాను ఆరోపణలు చేసిన టీఆర్ఎస్ నాయకులపై పబ్లిక్ ఫోరమ్ ఏర్పాటుచేసి నిర్దోషిత్వాన్ని నిరూపించుకోండని వైఎస్ షర్మిల సవాల్ విసిరారు. నిజానికి షోకాజ్ నోటీసులు సీఎం కేసీఆర్కే ఇవ్వాలన్నారు. ఎందుకంటే ఇచ్చిన హామీలను అమలు చేయనందుకు నోటీసులు ఇవ్వాలని పిలుపునిచ్చారు. సీఎం కేసీఆర్, ఆయన అనుచరుల నుంచి తనకు ప్రాణ హాని ఉందని షర్మిల ఆందోళన వ్యక్తం చేశారు.
పోలీసులు హైకోర్టు ఆర్డర్ను ఉల్లంఘిస్తున్నారని దీనిపై అప్పీల్కు వెళతామని వైఎస్ షర్మిల తెలిపారు. పోలీసులు తెలంగాణ పోలీసులుగా కాకుండా టీఆర్ఎస్ పోలీసులుగా మారిపోయారన్నారు. బండి సంజయ్ పాదయాత్ర బాగానే సాగుతోంది కదా.. మరి తన పాదయాత్ర ఎందుకు ఆపుతున్నారని షర్మిల ప్రశ్నించారు.
ఇవీ చదవండి:
