వచ్చే ఏడాది ఐపీఎల్(ipl 2022) సీజన్ కోసం మరో రెండు కొత్త ఫ్రాంచైజీలను(ipl new team) ప్రకటించింది బీసీసీఐ. అహ్మదాబాద్, లఖ్నవూ జట్లు వచ్చే సీజన్లో పోటీపడబోతున్నాయని అధికారికంగా వెల్లడించింది. దీంతో ఐపీఎల్-2022లో మొత్తం 10 జట్లు టైటిల్‌ పోరులో నిలబడనున్నాయి. అహ్మదాబాద్‌ను సీవీసీ క్యాపిటల్స్‌ పార్టనర్స్‌ దక్కించుకోగా, లఖ్నవూ.. ఆర్పీఎస్జీ గ్రూప్‌నకు దక్కింది. సీవీసీ క్యాపిటల్స్‌ పార్టనర్స్‌ ₹5,625 కోట్లకు, ఆర్పీఎస్జీ గ్రూప్‌ 7,090 కోట్లతో ఈ ఫ్రాంచైజీలు దక్కించుకున్నాయి. రెండు కొత్త జట్ల ఫ్రాంఛైజీల కోసం బీసీసీఐ ఇటీవల బిడ్లు ఆహ్వానించింది.
కొత్త జట్ల వివరాలు
| ఫ్రాంచైజీ | యాజమాన్యం | ధర |
| లఖ్నవూ | ఆర్పీసీజీ వెంచర్స్ లిమిటెడ్ | రూ.7.090 కోట్లు |
| అహ్మదాబాద్ | ఐరెలియా కంపెనీ ప్రై.లి (సీవీసీ క్యాపిటల్ పార్ట్నర్స్) | రూ.5625 కోట్లు |
మొత్తం 74 మ్యాచ్లు
వచ్చే సీజన్లో మొత్తం 10 జట్లతో 74 మ్యాచ్లు జరగనున్నాయి. ఇందులో ప్రతి జట్టు సొంత మైదానంలో 7, ప్రత్యర్థి మైదానంలో 7 మ్యాచ్లు ఆడాల్సి ఉంటుంది.
గంగూలీ ఏమన్నారంటే?
"వచ్చే సీజన్ కోసం ఎంపికైన రెండు కొత్త జట్లకు బీసీసీఐ స్వాగతం చెబుతోంది. లఖ్నవూ, అహ్మదాబాద్ పట్టణాల్లోనూ ఇకపై లీగ్ మ్యాచ్లు జరగనున్నాయి. ఇది దేశ క్రికెట్ ఆర్థికంగా మరింత బలంగా తయారవడానికి దోహదపడుతుంది. రెండు కొత్త జట్ల చేరికతో మరికొంత మంది దేశవాళీ క్రికెటర్లకు అవకాశం లభిస్తుంది. ఐపీఎల్ 2022 కోసం ఆత్రుతగా ఎదురుచూస్తున్నా" అంటూ తన సంతోషాన్ని వ్యక్తం చేశారు దాదా.
ఐపీఎల్- 2022లో బరిలో నిలిచే జట్లు ఇవే!
ఐపీఎల్-2022లో మొత్తం 10 జట్లు పాల్గొంటాయని బీసీసీఐ తెలిపింది. ప్రస్తుతం ఎనిమిది జట్లు పోటీపడుతున్నాయి. వాటిలో చెన్నై సూపర్‌ కింగ్స్‌, దిల్లీ క్యాపిటల్స్‌, కోల్‌కతా నైట్‌ రైడర్స్‌, ముంబయి ఇండియన్స్‌, పంజాబ్‌ కింగ్స్‌, రాజస్థాన్‌ రాయల్స్‌, రాయల్‌ ఛాలెంజర్స్‌ బెంగళూరు, సన్‌రైజర్స్ హైదరాబాద్‌లు ఉన్నాయి. తాజా వేలంలో కొత్తగా అహ్మదాబాద్, లఖ్నవూ జట్లు వచ్చి చేరాయి.
