IPL 2022 LSG Vs DC: ఐపీఎల్ 15వ సీజన్లో లఖ్నవూ మరో విజయం సాధించింది. దిల్లీతో జరిగిన మ్యాచ్లో ఆ జట్టు ఆరు పరుగుల తేడాతో గెలుపొందింది. 196 పరుగుల లక్ష్యంతో బరిలోకి దిగిన దిల్లీ నిర్ణీత 20 ఓవర్లలో 7 వికెట్ల నష్టానికి 189 పరుగులు మాత్రమే చేసింది. రిషభ్‌ పంత్ (44), అక్షర్ పటేల్ (42*), మిచెల్ మార్ష్‌ (37), పావెల్ (35) మెరుగ్గా రాణించారు. కుల్‌దీప్‌ (16*) ఫర్వాలేదనిపించగా.. పృథ్వీ (5), వార్నర్ (3), లలిత్ యాదవ్ (3), శార్దుల్ (1) విఫలమయ్యారు. లఖ్నవూ బౌలర్‌ మోహ్‌సిన్‌ ఖాన్‌ నాలుగు వికెట్లు తీసి అదరగొట్టగా.. చమీరా, రవి బిష్ణోయ్, కృష్ణప్ప గౌతమ్ తలో వికెట్‌ తీశారు. ఈ విజయంతో లఖ్నవూ (14) పాయింట్ల పట్టికలో రెండో స్థానానికి చేరుకుని ప్లేఆఫ్స్ అవకాశాలను మరింత మెరుగుపరుచుకుంది.
తొలుత టాస్‌ నెగ్గిన లఖ్నవూ బ్యాటింగ్‌ ఎంచుకుంది. నిర్ణీత 20 ఓవర్లలో ఆ జట్టు మూడు వికెట్ల నష్టానికి 195 పరుగులు చేసింది. కెప్టెన్‌ కేఎల్‌ రాహుల్ (77), దీపక్‌ చాహర్ (52) అర్ధ శతకాలు సాధించడం వల్ల దిల్లీ ఎదుట లఖ్నవూ 196 పరుగుల భారీ లక్ష్యాన్ని ఉంచింది. ఓపెనర్ డికాక్ 23, మార్కస్‌ స్టయినిస్ 17*, కృనాల్ పాండ్య 9* పరుగులు చేశారు. దిల్లీ బౌలర్లలో శార్దుల్ ఠాకుర్కు మూడు వికెట్లు దక్కాయి.
ఇదీ చదవండి: 'కోహ్లీ నుంచి బెంగళూరు జట్టు ఆశించేది అదే'
