లాక్డౌన్తో ఆర్థిక సమస్యలు ఎదుర్కొంటున్న బాలీవుడ్ డాన్సర్లకు అండగా నిలిచాడు హీరో వరుణ్ ధావన్. 200 మంది నృత్య కళాకారులకు కష్టాల నుంచి ఊరట పొందేందుకు వారి బ్యాంకు ఖాతాల్లో కొంత నగదును జమ చేశాడు. బాలీవుడ్ సినిమాల్లో గతంలో డాన్సర్గా పనిచేసిన రాజ్ సురానీ ఈ విషయాన్ని వెల్లడించారు.
"ఆర్థిక అవసరాలు ఉన్న డాన్సర్లును హీరో వరుణ్ ధావన్ ఆదుకున్నాడు. అతను హీరోగా డాన్సర్ పాత్రల్లో మూడు సినిమాలు నటించాడు. ఆ చిత్రాల్లోని నృత్యకళాకారులందరికీ సాయం చేశాడు. జీవనోపాధి లేకుండా వారు ఎలా జీవిస్తున్నారని ఆవేదన వ్యక్తం చేశాడు. వారి సమస్యలు పరిష్కరిస్తానని గతంలో వాగ్దానం చేయగా.. తాజాగా దాన్ని నెరవేర్చుకున్నాడు" అని రాజ్ సురానీ తెలిపారు.
సాయానికి ధన్యవాదాలు
డాన్సర్లకు ఆర్థిక సాయం చేసిన వారిలో ఇప్పటికే సిద్ధార్థ్ మల్హోత్రా, షాహిద్ కపూర్లూ ఉన్నారు. కొందరు నృత్యకళాకారులు ఇంటి అద్దె చెల్లించడం సహా వారి కుటుంబసభ్యులకు కావాల్సిన మెడిసిన్ను కొనడంలోనూ తీవ్ర ఆర్థిక ఇబ్బందులు ఎదుర్కొంటున్నారని రాజ్ సురానీ వెల్లడించారు. అలాంటి డాన్సర్లకు సహాయం చేసిన వారందరికీ ధన్యవాదాలు తెలియజేశారు.
హీరో వరుణ్ ధావన్ నటించిన 'కూలీ నెం.1' విడుదల కావాల్సిఉంది. ఇందులో వరుణ్ సరసన సారా అలీఖాన్ హీరోయిన్గా నటించింది. తొలుత మే 1న సినిమాను ప్రేక్షకుల ముందుకు రావాల్సి ఉండగా.. లాక్డౌన్ కారణంగా అదికాస్త వాయిదా పడింది.
