రాష్ట్రంలో కరోనా కేసుల పెరుగుదలను అంచనా వేయడానికి కర్ణాటక ప్రభుత్వం ఓ సర్వే నిర్వహించింది. ఇప్పటికే సుమారుగా 1.93 కోట్లు లేదా రాష్ట్ర జనాభాలో 27.3శాతం మందికి కరోనా సోకినట్లు ఈ సర్వేలో తేలింది. ఈ మేరకు ఓ నివేదికను విడుదల చేసింది ఆ రాష్ట్ర ఆరోగ్య మంత్రిత్వశాఖ.
మహమ్మారి ధాటికి 0.05శాతం మంది మరణించినట్లు వెల్లడైంది. అయితే ప్రస్తుతం ఈ రేటు తక్కువగా ఉండవచ్చని ఈ నివేదిక పేర్కొంది. తొలి రౌండ్ సెరో సర్వే ఫలితాల ప్రకారం మొత్తం మరణాల రేటు 0.07 శాతమని వెల్లడించింది. యాంటీబాడీ పరీక్షల ఆధారంగా రాష్ట్రంలో 16.4 శాతం మంది కొవిడ్ బారిన పడినట్లు తేలింది.
30జిల్లాల్లో సెప్టెంబరు 3 నుంచి 16వరకు సర్వే నిర్వహించినట్లు రాష్ట్ర ఆరోగ్య మంత్రి డాక్టర్ సుధాకర్ తెలిపారు. జిల్లాల్లో కరోనా ఏ విధంగా వ్యాపిస్తోంది.. వైరస్ వ్యాప్తి నివారణకు ఎటువంటి చర్యలు తీసుకోవాలి వంటి వాటి గురించి సమగ్ర సమాచారం తెలుసుకోవడానికి ఈ సర్వే నిర్వహించినట్లు ఆయన స్పష్టం చేశారు.
రాష్ట్రంలో మొత్తం 16,585 నమూనాలకుగానూ 15,624 నివేదికలు సమర్పించామని సుధాకర్ వెల్లడించారు. ఈ సర్వేలో ఆర్టీపీసీఆర్, రాపిడ్ యాంటిజెన్ సహా ఇమ్యునోగ్లోబులిన్ జీ టెస్ట్లు కూడా చేసినట్లు సుధాకర్ తెలిపారు.
ఇదీ చూడండి: మహారాష్ట్రలో రేపటి నుంచి సినిమా హాళ్లు ఓపెన్
