మధ్యప్రదేశ్ భోపాల్లో దారుణమైన ఘటన వెలుగు చూసింది. భార్యల మార్పిడి గేమ్ ఆడనందున తన భర్త విచక్షణారహితంగా కొట్టాడని ఓ మహిళ పోలీస్ స్టేషన్లో కంప్లైంట్ చేసింది. రాజస్థాన్లోని బీకానేర్ ప్రాంతంలోని ఓ హోటల్లో ఈ ఘటన జరగగా..మధ్యప్రదేశ్ భోపాల్లో కేసు నమోదైందని పోలీసులు తెలిపారు.
పోలీసుల కథనం ప్రకారం..
రాజస్థాన్ బీకానేర్లో ప్రాంతంలో అమ్మర్ అనే వ్యక్తి ఓ 5-స్టార్ హోటల్లో మేనేజర్గా పనిచేస్తున్నాడు. రెండురోజుల క్రితం బలవంతంగా తన భార్య వద్ద మొబైల్ లాక్కుని.. ఓ హోటల్ గదిలో బంధించాడు. తరువాత అమ్మర్ అక్కడకు చేరుకుని.. భార్యల మార్పిడి గేమ్ ఆడాలని కోరాడు. అందుకు నిరాకరించినందుకు ఆమెతో అసభ్యంగా మాట్లాడి.. విచక్షణారహితంగా కొట్టి బలవంతంగా శృంగారం చేశాడని అతని భార్య స్టేషన్లో ఫిర్యాదు చేసింది.
అమ్మర్కు మద్యం, డ్రగ్స్ తీసుకునే అలవాట్లు ఉన్నాయని అతడి భార్య తెలిపింది. పరాయి స్త్రీలు, పురుషులతో శృంగారం చేయడం అలవాటే అని పేర్కొంది. ఈ ఫిర్యాదులో రూ. 50 లక్షలు అధిక కట్నం తన అత్త, వారి కుటుంబం తనను వేదించినట్లు వివరించింది. తనని భర్త ఎప్పుడూ సరిగా చూసుకునే వాడు కాదని.. మోడ్రన్గా లేనంటూ కొట్టేవాడని కంప్లైంట్లో తెలిపింది. గాయపడిన ఆమెను బంధువులు తీసుకెళ్లి.. స్టేషన్లో కంప్లైంట్ చేయించారు. దీనిపై విచారణ చేపట్టినట్లు మహిళా పోలీస్ స్టేషన్ ఇన్చార్జ్ అంజనా దుర్వే వెల్లడించారు.
