CM Jagan Comments on Governance from Vizag: డిసెంబర్‌ నాటికి విశాఖకు రాబోతున్నా.. ఇక్కడే ఉంటా: సీఎం జగన్​

CM Jagan Comments on Governance from Vizag: విశాఖకు ఈ డిసెంబర్‌లోపు మారుతానని సీఎం జగన్​ స్పష్టం చేశారు. విశాఖలో పర్యటిస్తున్న జగన్​.. ఇన్ఫోసిస్‌ కార్యాలయాన్ని ప్రారంభించారు. ఈ కార్యక్రమం అనంతరం జీవీఎంసీ బీచ్‌ క్లీనింగ్‌ వాహనాలను ప్రారంభించారు. విశాఖ నగరానికి ఉజ్జ్వల భవిష్యత్ ఉందని ఈ సందర్బంగా జగన్‌ అన్నారు. వైజాగ్ కలల నగరంగా అభివృద్ధి చెందబోతోందని.. ఇన్ఫోసిస్‌ రాకతో విశాఖ మరింత వేగంగా వృద్ధి చెందుతుందని అన్నారు. వైసీపీ ప్రభుత్వం నుంచి ఇన్ఫోసిస్‌కు అన్ని విధాలుగా సహకరిస్తామని తెలిపారు. త్వరలోనే విశాఖకు మారి.. ఇక్కడి నుంచే పాలన అందించనున్నట్టు ప్రకటించారు. విశాఖకు ఈ డిసెంబర్‌లోపు మారుతానని వెల్లడించారు. 

ప్రారంభోత్సవం అనంతరం జగన్‌ మాట్లాడుతూ.. హైదరాబాద్‌, బెంగళూరు మాదిరిగా విశాఖలో అన్ని రకాల వసతులు ఉన్నాయి.. త్వరలోనే విశాఖ కూడా ఐటీ హబ్‌గా మారుతుందని అన్నారు. ఇప్పుడు విశాఖ ఎడ్యుకేషనల్‌ హబ్‌గా మారిందని అన్నారు. రాష్ట్రంలోనే విశాఖ అతి పెద్ద నగరం.. అక్కడ అంతర్జాతీయ విమానాశ్రయం, విస్తారమైన తీర ప్రాంతం కలిగి ఉందని అన్నారు. రాష్ట్రంలో పెట్టుబడులు పెట్టే కంపెనీలకు అన్ని రకాలుగా వసతులు కల్పిస్తామని సీఎం జగన్ హామీ ఇచ్చారు.