CM JAGAN APPRECIATE POLICE OFFICERS : పోలీసు అమరవీరుల సంస్మరణ దినోత్సవంలో ముఖ్యమంత్రి జగన్‌మోహన్‌రెడ్డి పాల్గొన్నారు. ముఖ్యమంత్రి అమరవీరుల త్యాగాలను తెలిపేలా రచించిన పుస్తకాన్ని సీఎం ఆవిష్కరణ చేశారు. దేశవ్యాప్తంగా 264 మంది, ఏపీలో 11 మంది 2021-2022 మధ్య విధినిర్వహణలో అమరులయ్యారన్నారు. ప్రాణాలు కోల్పోయిన కుటుంబాలకు ప్రభుత్వం అండగా ఉంటుందని సీఎం హామీ ఇచ్చారు. రాష్ట్రంలో 6,511 మంది పోలీసు నియామకాల కోసం జీవో ఇచ్చామని సీఎం వెల్లడించారు.
శ్రీకాకుళం, రాజమండ్రిల్లో ఐఆర్‌ (IR) బెటాలియన్లు ఏర్పాటు చేస్తామన్నారు. పోలీస్ ఉద్యోగాల్లో హోం గార్డ్లకి రిజర్వేషన్ కల్పిస్తామన్నారు. 16 వేల మంది మహిళా పోలీస్లను నియమించామని తెలిపారు. దిశ యాప్ను 1.17 లక్షల మంది డౌన్లోడ్ చేసుకున్నారని తెలిపారు. 23,339 దిశ ఫిర్యాదులు వస్తే, పోలీసులు స్పందించి కాపాడారన్నారు. పోలీస్ పనితీరు మెరుగుపడిందని ముఖ్యమంత్రి పేర్కొన్నారు. మహిళల కేసుల విషయంలో గతంలో నెలలు పట్టే విచారణను.. కేవలం 42 రోజుల్లోనే పూర్తి చేస్తున్నారన్న జగన్.. ఇది గొప్ప మార్పు అని అభినందించారు. రాష్ట్రంలో ఫిర్యాదులు పెరిగి నేరాలు తగ్గాయని తెలిపారు. ఆపదకి ముందే స్పందించిన ఐదుగురు పోలీసులను రాష్ట్ర ప్రభుత్వం వైఎస్ఆర్ అచీవ్మెంట్ కింద ఎంపిక చేశామని తెలిపారు.
శాంతి భద్రతలు కాపాడటంలో పోలీసులు రాజీ పడవద్దని సీఎం సూచించారు. హోం మంత్రి కూడా ఓ దళిత మహిళ అని ఆయన అన్నారు. సంక్షేమ అభివృద్ధి ఫలాలు ఇంటింటికి అమలు చేయడం వలన మావోయిజం తగ్గిందన్నారు. పోలీస్లకు సంబంధించిన పెండింగ్ అంశాలను పరిష్కరిస్తామని తెలిపారు. పోలీస్ వీక్లీ ఆఫ్లు అమలు చేయాలన్న సీఎం.. అందుకు అనుగుణంగా అడుగులు వేస్తామని సీఎం జగన్‌మోహన్‌రెడ్డి హామీ ఇచ్చారు. ఈ కార్యక్రమంలో ఇంఛార్జ్ సీఎస్ విజయానంద్, హోం మినిస్టర్ తానేటి వనిత, డీజీపీ రాజేంద్రనాథ్ రెడ్డి, పలువురు మంత్రులు, ఎమ్మెల్యేలు కార్యక్రమానికి హాజరయ్యారు.
ఇవీ చదవండి:
