Korea Open Winner : కొరియా ఓపెన్ సూపర్ 500 బ్యాడ్మింటన్ టోర్నీలో భారత స్టార్ షట్లర్స్ సాత్విక్ సాయిరాజ్, చిరాగ్ శెట్టి మరోసారి తమ సత్తాను చాటారు. హోరా హోరీగా జరిగిన పురుషుల డబుల్స్ ఫైనల్స్లో ఇండోనేషియాకు చెందిన టాప్‌ సీడ్‌ ఫజర్‌ అల్‌పయాన్‌–ముహమ్మద్‌ రియాన్‌ జంటపై 17-21, 21-13, 21-14 తేడాతో విజయాన్ని సాధించారు.
తొలి గేమ్‌ను 17-21లో ఓడినప్పటికీ రెండో మ్యాచ్లో వేగం ఫుంజుకున్న ఈ జోడి.. ప్రత్యర్థి జంట చేస్తున్న సర్వీస్‌ను పదే పదే బ్రేక్‌ చేస్తూ ఆధిక్యంలో దూసుకెళ్లారు. అలా 21-13తో రెండో గేమ్‌ను సొంతం చేసుకున్నారు. ఆ తర్వాత జరిగిన కీలకమైన మూడో గేమ్‌లోనూ బలమైన స్మాష్‌ సర్వీస్‌లతో విరుచుకుపడిన సాత్విక్-చిరాగ్ జోడి ప్రత్యర్థికి ఏ మాత్రం అవకాశమివ్వకుండా 21-14తో గేమ్‌ను ఓ కొలిక్కి తీసుకొచ్చి టైటిల్ను ముద్దాడారు. ఈ విజయంతో సాత్విక్-చిరాగ్ జోడీ ఈ ఏడాది వరుసగా మూడో టైటిల్ను సొంతం చేసుకుంది.
Korea Open 2023 : 4-2తో టోర్నీని ప్రారంభించిన ఇండోనేషియా జోడీ.. వరుసగా 6 పాయింట్లు సాధించి 11-4తో ఆధిక్యంలోకి దూసుకెళ్లింది. ఆ తర్వాత భారత జోడీ ప్రతిఘటించినప్పటికీ.. ఏమాత్రం అవకాశం ఇవ్వని ఇండోనేషియా ద్వయం 21-17తో తొలి గేమ్‌ను సొంతం చేసుకుంది.
ఆ తర్వాత నుంచి వేగం పెంచిన సాత్విక్-చిరాగ్ జోడీ రెండో గేమ్‌లో దుమ్మురేపారు. 5-4తో ఆధిక్యంలో వెళ్లి అదే జోరును కొనసాగించారు. బలమైన స్మాష్‌లతో 15-10తో లీడ్‌ను రెట్టింపు చేసుకున్న భారత ద్వయం.. వరుసగా 6 పాయింట్లు సాధించి 21-11 తేడాతో గేమ్‌ను సొంతం చేసుకుంది. అయితే వారు ఆఖరికి డిసైడర్ గేమ్ ఆడాల్సి వచ్చింది. ఈ క్రమంలో తుది గేమ్‌ను కూడా సాత్విక్-చిరాగ్‌లు అద్భుతంగా ఆరంభించారు. ఆరంభంలోనే 6-3తో ఆధిక్యం సాధించిన జంట.. అదే జోరును కొనసాగించి ఆధిక్యాన్ని చేజిక్కిచ్చుకున్నారు. అలా 21-13తో మూడో గేమ్‌ను గెలుచుకున్న భారత్ ద్వయం.. కొరియా ఓపెన్ టైటిల్ను సొంతం చేసుకున్నారు.
