రాష్ట్ర ఎన్నికల కమిషనర్ పునర్నియామక అంశంపై దాఖలైన వ్యాజ్యంలో సుప్రీంకోర్టు తుది తీర్పు ఇచ్చే వరకు ఎస్ఈసీగా రమేశ్ కుమారే కొనసాగుతారని వైకాపా ఎంపీ రఘరామకృష్ణరాజు అభిప్రాయపడ్డారు. రమేశ్ కుమార్ను పునర్నియమించాలంటూ హైకోర్టు ఇచ్చిన తీర్పుపై స్టే ఇచ్చేందుకు సుప్రీంకోర్టు నిరాకరించిన నేపథ్యంలో ప్రస్తుతానికి హైకోర్టు తీర్పే చెల్లుబాటువుతుందన్నారు. రమేశ్ కుమార్ను పునర్నియమించే బాధ్యత గవర్నర్ పైనే ఉంటుందని చెప్పారు.
సారాంశాన్ని అన్వయించుకోవాలి..
'రమేశ్ కుమార్ కేసులో హైకోర్టు ఇచ్చిన తీర్పును సమగ్రంగా పరిశీలించి.. మొత్తం సారాంశాన్ని అన్వయించుకోవాలే తప్ప...ప్రతి వాక్యానికి విడిగా భాష్యం చెప్పడం కుదరదు. రమేశ్ కుమార్ను తిరిగి ఎస్ఈసీగా నియమించకపోతే కోర్టు ధిక్కరణ నేరం కింద ప్రభుత్వంపై కోర్టులో పిటిషన్ వేసేందుకూ ఆయనకు అవకాశముంది. రమేశ్ కుమార్ను రాజ్యాంగంలోని 243 కె అధికారం ప్రకారం గవర్నర్ నియమించారు. జస్టిస్ కనగరాజ్ను ఏపీ పంచాయతీరాజ్ చట్టం కింద నియమించారు. జస్టిస్ కనగరాజ్ నియామకం చెల్లకపోతే... రమేశ్ కుమార్ నియామకం కూడా చెల్లదన్న వాదన సరికాదు' - రఘురామకృష్ణరాజు, వైకాపా ఎంపీ
ఇదీ చదవండి:
