Honor Killing in Saroor Nagar: తెలంగాణ రాష్ట్రంలోని రంగారెడ్డి జిల్లా మర్పల్లి గ్రామానికి చెందిన బిల్లాపురం నాగరాజు, మర్పల్లి సమీపంలోని ఘనాపూర్‌ గ్రామంలో నివసించే సయ్యద్‌ ఆశ్రిన్ సుల్తానా.. ఏడేళ్ల నుంచి ప్రేమించుకుంటున్నారు. ఈ విషయం తెలిసి ఆశ్రిన్ కుటుంబ సభ్యులు అతడిని హెచ్చరించారు. ఆశ్రిన్‌ను పెళ్లిచేసుకుందామని నిర్ణయించుకున్న నాగరాజు.. హైదరాబాద్‌లోని ఓ ప్రముఖ కార్ల కంపెనీలో కొద్దినెలల కిందట సేల్స్‌మన్‌గా చేరాడు. కొత్త సంవత్సరం రోజు ఆశ్రిన్‌ను రహస్యంగా కలుసుకున్న నాగరాజు కొద్దిరోజుల్లో పెళ్లి చేసుకుందామని చెప్పాడు. అంగీకరించిన ఆశ్రిన్.. జనవరి చివరి వారంలో పారిపోయి హైదరాబాద్‌కు వచ్చింది. లాల్‌దర్వాజలోని ఆర్యసమాజ్‌లో జనవరి 31న ఇద్దరూ పెళ్లి చేసుకున్నారు.
వివాహం అనంతరం ఎవరూ తమను గుర్తించకుండా నాగరాజు వేరే ఉద్యోగంలోకి మారిపోయాడు. వీరు హైదరాబాద్లో ఉంటున్నట్లు ఆశ్రిన్ కుటుంబ సభ్యులు పసిగట్టడంతో కొత్తజంట రెండు నెలల కిందట విశాఖపట్నం వెళ్లి అక్కడే ఉన్నారు. ఎవరూ తమను వెంటాడటం లేదని భావించి.. అయిదు రోజుల కిందట మళ్లీ నగరానికి వచ్చారు. సరూర్‌నగర్‌లోని పంజా అనిల్‌కుమార్‌ కాలనీలో నివసిస్తున్నారు. వీరి కదలికలను గుర్తించిన ఆశ్రిన్ కుటుంబ సభ్యులు మాటువేశారు. బుధవారం రాత్రి నాగరాజు, ఆశ్రిన్‌లు కాలనీలోంచి బయటకు రాగానే ఆశ్రిన్ సోదరుడు, అతడి స్నేహితుడు బైక్‌పై వారిని వెంబడించి దాడికి పాల్పడ్డారు. నాగరాజుపై ఇనుపరాడ్లు, కత్తులతో దాడి చేసి హత్య చేశారు.
"నాగరాజు, నేను ఏడేళ్లుగా ప్రేమలో ఉన్నాం. నా కోసం తను మతం కూడా మార్చుకుంటానని చెప్పాడు. కానీ మా ఇంట్లో వాళ్లు అంగీకరించలేదు. అందుకే బయటకు వచ్చి పెళ్లి చేసుకున్నాం. కానీ ఇలా పగ పెంచుకుని నా భర్తను చంపుతారని ఊహించలేదు. చంపొద్దని కాళ్ల మీద పడి వేడుకున్నా కనికరించలేదు. పెద్ద పెద్ద ఇనుప రాడ్లతో నాగరాజుపై దాడి చేశారు. వాళ్ల బలం ముందు నేను ఓడిపోయా." -ఆశ్రిన్ సుల్తానా, బాధితురాలు
తన సోదరుడే భర్తను కిందపడేసి ఇనుపరాడ్డుతో తలపై విచక్షణారహితంగా కొట్టి చంపేయడంతో ఆ యువతి ఒక్కసారిగా షాక్‌కు గురైంది. రక్తపు మడుగులో భర్తను చూసి పెద్దగా రోదిస్తూ కేకలు వేసింది. దాడి జరుగుతున్న సమయంలో అశ్రిన్‌ తన భర్తను చంపవద్దంటూ కాళ్ల మీద పడి వేడుకున్నా కనికరించలేదని బాధితురాలు కన్నీటి పర్యంతమైంది. అప్రమత్తమైన స్థానికులు సమాచారం ఇవ్వడంతో పోలీసులు వెంటనే సంఘటనా స్థలానికి చేరుకున్నారు. ప్రత్యేక బృందాలతో గాలింపు చేపట్టి నిందితుడిని అదుపులోకి తీసుకున్నారు. నాగరాజు బంధువులు ఆశ్రిన్‌ను వెంట తీసుకెళ్లారు. హత్యపై సాక్ష్యాధారాలు సేకరించామని ఏసీపీ శ్రీధర్‌రెడ్డి తెలిపారు. ఈ ఘటనతో ఆగ్రహం చెందిన భాజపా నేతలు నిందితులను కఠినంగా శిక్షించాలంటూ పోలీస్‌స్టేషన్‌ ఎదుట ఆందోళనకు దిగారు.
"ప్రేమ వివాహం ఇష్టంలేని అమ్మాయి సోదరుడు, బంధువు.. వీరిద్దరూ సరూర్నగర్లో ఉంటున్నట్లు తెలుసుకుని మాటు వేసి దాడికి పాల్పడ్డారు. సమాచారం అందిన వెంటనే సంఘటనాస్థలానికి చేరుకుని దర్యాప్తు చేపట్టాం. నిందితుడిని అదుపులోకి తీసుకున్నాం." -శ్రీధర్ రెడ్డి, ఎల్బీనగర్ డీసీపీ
ఇవీ చదవండి: బాలికపై ఐదుగురు గ్యాంగ్ రేప్.. స్కూల్ నుంచి వస్తుండగా..
