రియల్ ఎస్టేట్ పేరుతో అడవులను నాశనం చేసుకుంటున్నామని భారత్ బయోటెక్ సీఎండీ కృష్ణా ఎల్లా అభిప్రాయపడ్డారు. డీఫారెస్టేషన్ వల్ల జనావాసాలకు జంతువులే కాదు... అవి మోసుకొచ్చే సాంక్రమిక వ్యాధులతో సైతం మానవాళి పోరాడాల్సి ఉంటుందని కృష్ణా ఎల్లా హెచ్చరించారు. సూక్ష్మజీవులు మనకన్నా తెలివైనవని.. వాతావరణ మార్పుల కారణంగా మరిన్ని వైరస్లు మానవుడిపై దాడి చేసే అవకాశాలున్నాయన్నారు. 1996లో భారత్కు తిరిగొచ్చాక ఇక్కడి నీటి సమస్యలు, దోమల బెడద తనను ఆలోచనలో పడేశాయని.. ఈ సమస్యలే తన స్టార్టప్నకు ఆయువు పోశాయని పేర్కొన్నారు. ప్రజా సమస్యలే ఇన్నోవేటివ్ ఐడియాలుగా ఎంచుకొని.. రోటావాక్, టైఫాయిడ్ కాంజుగేట్ వ్యాక్సిన్లతో పాటు, చికన్గున్యా, జికా వైరస్లకు తమ కంపెనీ వ్యాక్సిన్ అభివృద్ధి చేసినట్లు కృష్ణా ఎల్లా తెలిపారు. ఇండియన్ కంపెనీ నుంచి గ్లోబల్ కంపెనీగా భారత్ బయోటెక్ ఎదిగిందని తెలిపారు.
"ఆలోచనే ఆవిష్కరణకు మూలమని.. డిగ్రీలు, నైపుణ్యాలతో పాటు ఊహే ఇన్నోవేషన్కు ప్రాణం పోస్తుంది. భారతీయ విద్యార్థులు డిగ్రీలు, నైపుణ్యాలతో పాటు థాట్ ప్రాసెస్ను పెంపొందించుకోవాలి. సంక్లిష్ట ఆలోచనలు వదిలి.. సింపుల్ థింకింగ్ అలవాటు చేసుకోవటం ద్వారా సమస్యలకు పరిష్కారం దొరుకుతుంది. భారతీయ సాంప్రదాయ ఉత్పత్తులకు వాల్యు యాడ్ చేసి ఎగుమతి చేయాల్సిన అవసరముంది. తద్వారా జీడీపీ వృద్ధి చెందుతుంది. రైతులకు ఉత్పత్తిలో కన్నా.. మార్కెటింగ్లో మద్దతు అవసరం. జన్యు మార్పిడి పంటలు మనం వదులుకొని రెవెన్యూ కోల్పోతున్నాం. మామిడి పళ్ల ఎగుమతుల కన్నా.. దానిమ్మ పండ్ల ఎగుముతులపై దేశం దృష్టి పెడితే మరింత గ్లోబల్గా విస్తృతంగా మార్కెట్ చేయవచ్చు." - కృష్ణా ఎల్లా, భారత్ బయోటెక్ సీఎండీ
ఇప్పటివరకూ దక్షిణ, పశ్చిమ భాగానికే పరిమితమైన బయెటెక్ క్లస్టర్ను తూర్పు భారత్ వైపు విస్తరించేందుకు 500 కోట్ల రూపాయల పెట్టుబడితో ఒడిశాలోని భువనేశ్వర్లో నూతన బయోటెక్ క్లస్టర్ నిర్మిస్తున్నట్లు ఈ సందర్భంగా కృష్ణా ఎల్లా తెలిపారు. ప్రతి దేశం వారి వ్యాక్సిన్ను మార్కెట్ చేసుకోవాలనే స్ట్రాటజీతో ముందుకెళ్తుందని.. ఇదే భారత్ బయోటెక్కు ఇంటర్నేషనల్ ట్రావెలింగ్పై ఆంక్షల విధింపునకు కారణమని కృష్ణా ఎల్లా చెప్పుకొచ్చారు. ఈ గ్లోబల్ పాలిటిక్స్ ఎక్కువ రోజులు పనిచేయవని.. రాబోయే రెండు, మూడేళ్లలో కొవాగ్జిన్ గ్రహీతలకు ఇంటర్నేషనల్ ట్రావెలింగ్కు అభ్యంతరాలు చెరిపేసేలా ప్రపంచ ఆరోగ్య సంస్థ కీలక ప్రకటన చేసే అవకాశమున్నట్లు కృష్ణా ఎల్లా ప్రకటించారు.
ఇదీ చూడండి:
