Twitter Data Breach : ఎలాన్ మస్క్ నేతృత్వంలో ట్విట్టర్కు మరో ఎదురుదెబ్బ తగిలింది. 40 కోట్ల మంది ట్విట్టర్ వినియోగదారుల డేటాను దొంగిలించి డార్క్ వెబ్లో అమ్మకానికి పెట్టినట్లు హ్యాకర్ ప్రకటించాడు. ఈ విషయాన్ని ఇజ్రాయెలీ సైబర్ ఇంటెలిజెన్స్ సంస్థ హడ్సన్ రాక్ వెల్లడించింది. ఇందులో ప్రముఖల ఈ-మెయిల్స్, ఫోన్ నంబర్లు సైతం ఉన్నాయని తెలిపింది. ప్రపంచ ఆరోగ్య సంస్థ(డబ్ల్యూహెచ్ఓ), కేంద్ర సమాచార మంత్రిత్వ శాఖ, గూగుల్ సీఈఓ సుందర్ పిచాయ్, అమెరికన్ సింగర్ చార్లీ పుత్ తదితరుల సమాచారం చోరీకి గురైందని హడ్సక్ రాక్ సంస్థ పేర్కొంది. అలాగే హ్యాకర్ షేర్ చేసిన చిత్రాలను పోస్ట్ చేసింది.
"నేను 40 కోట్ల మంది ట్విట్టర్ వినియోగదారుల డేటాను విక్రయిస్తున్నాను. ట్విట్టర్ అధినేత ఎలాన్ మస్క్ నేను పెట్టిన ఈ పోస్ట్ను చదువుతున్నట్లయితే ఒక ఒప్పందం కుదుర్చుకునేందుకు ముందుకు రావాలి. ఈ డేటాను కొనేందుకు ముందుకు రావాలి. ఇప్పటికే ట్విట్టర్కు 54 లక్షల మంది డేటా లీక్ వల్ల జనరల్ డేటా ప్రొటెక్షన్ రెగ్యులేషన్(జీడీపీఆర్) చట్టం ప్రకారం భారీ జరిమానా పడే అవకాశం ఉంది. మళ్లీ 40 కోట్ల మంది డేటా లీక్ వల్ల 2.77 మిలియన్ డాలర్ల జరిమానా పడుతుంది. ఫేస్బుక్ అంతకుముందు ఈ చట్టం ఉల్లంఘన వల్ల జరిమానా చెల్లించింది. అలా కాకుండా మీరే 40 కోట్ల మంది డేటాను కొనుగోలు చేయండి. ఇంకెవరికీ ట్విట్టర్ డేటాను విక్రయించను."
--హ్యాకర్
అవకాశం వస్తే ట్విట్టర్ బాధ్యతలు చేపడతా..
ట్విట్టర్ సీఈఓగా వైదొలుగుతున్నానని కొద్దిరోజుల క్రితం ఎలాన్ మస్క్ ప్రకటించారు. తదుపరి సీఈఓ వచ్చేంతవరకు ఈ బాధ్యతల్లో కొనసాగుతానని ఆయన తెలిపారు. ఈ నేపథ్యంలో ట్విట్టర్ సీఈఓగా బాధ్యతలు చేపట్టేందుకు తాను సిద్ధమని ఇండో-అమెరికన్ వి.ఎ శివ అయ్యదురై తెలిపారు. అయ్యదురై.. మహారాష్ట్రలోని ముంబయిలో జన్మించారు. 1978లో ఈమెయిల్ పేరిట ఓ కంప్యూటర్ ప్రోగ్రామ్ను రూపొందించారు. 1982లో ఈయనకు అమెరికా ప్రభుత్వం ఈ-మెయిల్ తొలి కాపీరైట్ను ఇచ్చింది. తద్వారా అయ్యదురై ఈ-మెయిల్ సృష్టికర్తగా పేరు గాంచారు.
'నాకు ట్విట్టర్ సీఈఓ పదవిపై ఆసక్తి ఉంది. మసాచుసెట్స్ ఇన్స్టిట్యూట్ ఆఫ్ టెక్నాలజీ నుంచి నాలుగు డిగ్రీలు సంపాదించాను. ఏడు విజయవంతమైన హైటెక్ సాఫ్ట్వేర్లను రూపొందించాను. సీఈఓ పదవి కోసం దరఖాస్తు చేసే ప్రక్రియ గురించి దయచేసి సలహా ఇవ్వండి'
--మస్క్ను ట్యాగ్ చేస్తూ అయ్యదురై చేసిన ట్వీట్
