Android Phone Users Alert : ప్రపంచవ్యాప్తంగా కోట్లాది మంది ఆండ్రాయిడ్ ఫోన్లను వాడుతున్నారు. వాళ్లను లక్ష్యంగా చేసుకుని సైబర్ నేరగాళ్లు 'డర్టీ స్ట్రీమ్' అనే ఒక మాల్వేర్ను ప్రయోగిస్తున్నారు. దీనితో యూజర్ల ఫోన్ను హ్యాక్ చేసి, వాళ్ల డివైజ్ను పూర్తిగా కంట్రోల్లోకి తెచ్చుకుంటున్నారు. ఈ విషయం తెలుసుకున్న మైక్రోసాఫ్ట్ కంపెనీ సెక్యూరిటీ టీమ్ - ఆండ్రాయిడ్ యూజర్లను జాగ్రత్తగా ఉండమని హెచ్చరిస్తోంది.
ఆండ్రాయిడ్ ఆపరేటింగ్ సిస్టమ్లోని అత్యంత కీలకమైన కంటెంట్ ప్రొవైడర్ సిస్టమ్ను లక్ష్యంగా చేసుకుని డర్టీ స్ట్రీమ్ అనే మాల్వేర్ దాడి చేస్తుంది. తరువాత ఆ డివైజ్ను పూర్తిగా తన కంట్రోల్లోకి తీసుకుంటుంది. యూజర్ల ప్రమేయం లేకుండా, ఇంటర్ యాప్ కమ్యునికేషన్, ఫైల్ షేరింగ్ చేయగలుగుతుంది. ఈ విధంగా హ్యాకర్లు ఆండ్రాయిడ్ ఫోన్ యూజర్ల డేటాను సులువుగా యాక్సెస్ చేయగలుగుతున్నారు. అలాగే డివైజ్ ఫంక్షనాలిటీని కూడా మార్చగలుగుతున్నారు. ఇది యూజర్ల ప్రైవసీకి, భద్రతకు పెనుముప్పుగా మారే ప్రమాదం ఉంది.
ఈ యాప్స్ను వెంటనే అన్ఇన్స్టాల్ చేయండి!
ప్లేస్టోర్లో పలు దుర్భలమైన, హానికరమైన యాప్స్ ఉన్నట్లు మైక్రోసాఫ్ట్ భద్రత సిబ్బంది గుర్తించారు. ఆ యాప్స్ అన్నీ కలిపి సుమారుగా 4 బిలియన్ల డౌన్లోడ్స్ కలిగి ఉన్నాయని పేర్కొన్నారు. వాటిలో ప్రధానమైన యాప్స్ :
- షావోమీ ఫైల్ మేనేజర్ - 1 బిలియన్ డౌన్లోడ్స్
- డబ్ల్యూపీఎస్ (WPS) ఆఫీస్ - 500 మిలియన్ డౌన్లోడ్స్
వాస్తవానికి ఈ యాప్ల కోసం సెక్యూరిటీ ప్యాచ్లను విడుదల చేశారు. అయినప్పటికీ ఇవి ఎంత వరకు పనిచేస్తాయో చెప్పలేము. కనుక వెంటనే ఈ యాప్లను అన్ఇన్స్టాల్ చేయాలని సైబర్ సెక్యూరిటీ నిపుణులు చెబుతున్నారు.
రక్షణ లేదా?
సైబర్ దాడుల నుంచి రక్షణ పొందాలంటే, కచ్చితంగా అధికారిక ప్లే స్టోర్ల నుంచి మాత్రమే యాప్స్ డౌన్లోడ్ చేసుకోవాలి. థర్డ్-పార్టీ యాప్లను, అనధికారిక సోర్స్ల్లో ఉండే యాప్లను ఇన్స్టాల్ చేయకూడదు. కచ్చితంగా గూగుల్ ప్లే ప్రొటక్ట్ను ఎనేబుల్ చేసుకోవాలి. అప్పుడే ఈ బిల్ట్-ఇన్ మాల్వేర్ ప్రొటక్షన్ ఫీచర్ - మీరు డౌన్లోడ్ చేసిన యాప్లను పూర్తిగా స్కాన్ చేసి, వైరస్లు, మాల్వేర్లు ఉంటే మిమ్మల్ని హెచ్చరిస్తుంది.
సైడ్ లోడింగ్ యాప్స్ వద్దు!
మీ డివైజ్లో ఎట్టి పరిస్థితుల్లోనూ యాప్స్ సైడ్ లోడింగ్ కాకుండా చూసుకోండి. ఎందుకంటే, సైడ్ లోడింగ్ యాప్స్ వల్ల ప్రమాదకరమైన వైరస్లు, మాల్వేర్లు మీ డివైజ్లోకి ప్రవేశించే అవకాశం ఉంది.
