Drinking Water Proplem in Vijayawada : కృష్ణమ్మ పక్కనే ఉంది. అయినా విజయవాడ నగరవాసులు తాగునీటి కష్టాలు ఎదుర్కొంటున్నారు. నగరంలో పలు కాలనీల ప్రజలకు స్వచ్ఛమైన తాగునీరు కాకుండా ఇంటింటికీ కుళాయి ద్వారా బోరు నీళ్లను అధికారులు సరఫరా చేస్తున్నారు. ఇష్టారీతిన పన్నులు కట్టించుకుంటూ బోరు నీళ్లు సరఫరా చేయడమేంటని జనం ప్రశ్నిస్తున్నారు.
Vijayawada Water Issue : విజయవాడ నగర పాలక సంస్థ పరిధిలోని 9, 11 డివిజన్లలోని పలు కాలనీలు, 12, 13, 14 డివిజన్లలోని అన్ని ప్రాంతాలకు బోరునీళ్లే సరఫరా అవుతోంది. నాలుగేళ్ల క్రితం వరకూ ఈ ప్రాంతాల వాసులు స్వచ్ఛమైన నీరు తాగేవారు. ఐతే గంగిరెద్దుల దిబ్బ వద్ద నిర్మించిన రిజర్వాయర్‌ సామర్థ్యం అన్ని ప్రాంతాలకు మంచి నీరు సరఫరా చేసేందుకు సరిపోకపోవడంతో బోరు నీళ్లు అందిస్తున్నారు. జేడీ నగర్‌లో మూడు వేల లీటర్ల సామర్ధ్యం గల ట్యాంకుల్లో ఐదు బోర్ల సహాయంతో నీళ్లు నింపుతున్నారు. వాటినే ఈ ప్రాంతాలకు పంపిస్తున్నారు. ఈ బోరు నీటిలో చెత్త వస్తోందని స్థానికులు వాపోతున్నారు.
వీఎంసీ (VMC) అందిస్తున్న బోరు నీళ్లు శుభ్రంగా లేకపోవడంతో తాగడానికి, వంట చేసుకునేందుకు వాటర్‌ ప్లాంట్ల నుంచి నీళ్లు కొనుగోలు చేస్తున్నామని స్థానికులు చెబుతున్నారు. నీటి కోసం నెలకి వెయ్యి రూపాయల వరకు ఖర్చు చేయాల్సి వస్తోందని వాపోతున్నారు. వీఎంసీకి పన్నులు చెల్లిస్తూ బయట నుంచి నీళ్లు కొనుగోలు చేయాల్సి వస్తోందని మండిపడుతున్నారు.
" ప్రజలకు స్వచ్ఛమైన, శుభ్రమైన, కలుషితం లేని తాగునీరు సరఫరా చేయకుండా బోరు నీరును సరఫరా చేస్తున్నారు. ఆ బోరునీటిలో కూడా చెత్తాచెదారం వస్తున్నాయి. ఆ నీరు తాగలేక బయట నుంచి తెచ్చుకుంటున్నాము. ప్రతి నెల నీటి కోసమే రూ. 1000 నుంచి రూ.3000 వరకు వెచ్చిస్తున్నాము. అధికారులకు ఫిర్యాదు చేస్తే వచ్చి తూతూ మాత్రంగా పనులు చేసి వెళ్లిపోతున్నారు కానీ సమస్యను మాత్రం పరిష్కరించలేదు. ఇతర పన్నులతో పాటు నీటి పన్ను కూడా వసూలు చేస్తున్నారు. మాకు బోరు నీరు బదులు కృష్ణ నీరు సరఫరా చేయవలసిందిగా కోరుకుంటున్నాము" -విజయవాడ వాసులు
వాంబే కాలనీ వాసుల వ్యధ - ఈ నీరు తాగేదెలా? - Drinking Water Problem
