Mutton Keema Biryani: బిర్యానీ అనగానే చికెన్ దమ్ బిర్యానీ, చికెన్ ఫ్రై పీస్ బిర్యానీ, మటన్ బిర్యానీ, ప్రాన్స్ బిర్యానీ గుర్తొస్తాయి. అయితే.. రోజూ వాటినే తింటే స్పెషల్ ఏముంది? అందుకే.. ఈసారి నోరూరించే కీమా బిర్యానీ లాగించండి. దీన్ని ప్రిపేర్ చేయడం కూడా ఈజీనే. మరి దానికి కావాల్సిన పదార్థాలు, తయారీ విధానం ఈ స్టోరీలో చూద్దాం..
కీమా బిర్యానీకి కావాల్సిన పదార్థాలు:
- మటన్ కీమా - 1 కేజీ
- బాస్మతి రైస్- అరకిలో
- వేయించిన ఉల్లిపాయ ముక్కలు- కప్పు
- సన్నగా తరిగిన పచ్చి ఉల్లిపాయ ముక్కలు - అర కప్పు
- పచ్చిమిరపకాయలు- 3
- లవంగాలు-4
- దాల్చిన చెక్క-2
- యాలకులు-2
- మిరియాలు - 10
- జాపత్రి - కొద్దిగా
- జాజికాయ - 1
- మరాఠి మొగ్గ -1
- బిర్యానీ ఆకులు - 2
- షాజీరా - చిటికెడు
- అనాస పువ్వు - 2
- అల్లంవెల్లుల్లి ముద్ద - 2 టీస్పూన్లు
- జీలకర్ర - 1 టీస్పూన్
- ధనియాల పొడి,
- ఉప్పు- తగినంత,
- కారం - తగినంత
- పెరుగు- 200 గ్రాములు
- నూనె- పావుకప్పు
- కొత్తిమీర, పుదీనా- కప్పు చొప్పున,
- నెయ్యి - 2 టీస్పూన్లు
- నీరు - తగినంత
- ఫుడ్ కలర్ (కావాలనుకుంటే)
తయారీ విధానం:
- ముందుగా బాస్మతీ బియ్యాన్ని కడిగి 20 నిమిషాలు నానబెట్టుకోవాలి.
- ఇప్పుడు స్టవ్ మీద మందపాటి కడాయి పెట్టి నూనె పోసి వేడి చేసుకోవాలి. మరోవైపు ఇంకో స్టవ్ మీద గిన్నె పెట్టి రెండు లీటర్ల నీరు పోసి వేడి చేసుకోవాలి.
- ఇప్పుడు నూనె వేడెక్కాక ఉల్లిపాయ ముక్కలు, పచ్చిమిర్చి ముక్కలు వేసి గోల్డెన్ బ్రౌన్ కలర్ వచ్చేవరకు వేయించుకోవాలి.
- ఆ తర్వాత జీలకర్ర, మిరియాలు, యాలకులు, లవంగాలు, అల్లం వెల్లుల్లి పేస్ట్, రుచికి సరిపడా కారం వేసి వేయించాలి. ఓ రెండు నిమిషాల తర్వాత కీమా, పెరుగు, కొద్దిగా ఉప్పు వేసి వేయించాలి.
- కీమాలో నీరు ఇంకి పోయి ముప్పావు వంతు ఉడికిన తర్వాత స్టవ్ ఆఫ్ చేసి పక్కకు పెట్టుకోవాలి.
- ఇప్పుడు మరో స్టవ్ మీద పెట్టిన నీళ్లు మరుగుతున్న సమయంలో బిర్యానీ ఆకు, అనాసపువ్వు, జాపత్రి, జాజికాయ పొడి, మరాఠీ మొగ్గ, షాజీరా, దాల్చిన చెక్క, ధనియాల పొడి, కొద్దిగా ఉప్పు వేసుకోవాలి.
- ఇప్పుడు మరుగుతున్న నీటిలో నానబెట్టిన బాస్మతీ బియ్యం వేసి 60 శాతం కుక్ అయిన తర్వాత స్టవ్ సిమ్లో పెట్టాలి.
- ఇప్పుడు మరో పెద్ద గిన్నె తీసుకుని అందులోకి ముప్పావంతు ఉడికిన అన్నాన్ని చిల్లుల గంటె సాయంతో తీసి పొరలా వేసుకోవాలి.
- ఆ పైన రెడీ చేసుకున్న కీమా మిశ్రమం, వేయించిన ఉల్లిపాయముక్కలు కొద్దిగా, కొత్తిమీర, పుదీనా కొద్దిగా వేసుకోవాలి.
- మళ్లీ ఇంకోసారి అదే విధంగా అన్నం, కీమా, ఉల్లిపాయ ముక్కల కలిపి అలా మూడు పొరలుగా వేసుకోని చివరగా మిగిలిన అన్నాన్ని వేసుకోవాలి.
- ఇక అన్నంపైన వేయించిన ఉల్లిపాయ ముక్కలు, నెయ్యి, కొద్దిగా ఫుడ కలర్ కలిపిన నీళ్లు వేసి మూత పెట్టి 20 నిమిషాలు కుక్ చేసుకోవాలి.
- అంతే ఎంతో టేస్టీ అండ్ స్పైసీ కీమా బిర్యానీ రెడీ. దీనిని కుకుంబర్ రైతాతో తింటే కాంబినేషన్ అద్దిరిపోద్ది.
సండే స్పెషల్ - మధురై కుందు భాయ్‌ స్టైల్‌ బిర్యానీ ట్రై చేయండి!
రెస్టారెంట్ స్టైల్లో చికెన్ 65 - ఇలా చేశారంటే వావ్ అనాల్సిందే!
How to Prepare Hyderabadi Chicken Dum Biryani : సండే ధమాకా.. హైదరాబాదీ బిర్యానీ.. ట్రై చేయండిలా..!
