வேலூர்: தோட்டப்பாளையம் பகுதியில் பிரபலமான துணிக்கடை ஒன்று இயங்கி வருகிறது. இந்த நிறுவனத்தின் வாகனங்கள் நிறுத்தும் இடமானது கீழ் தளத்தில் இயங்கி வருகிறது. அதன்படி, வாடிக்கையாளர்கள் தங்களின் வாகனங்களை கீழே நிறுத்தி விட்டு துணி எடுப்பதற்காக கடைக்குள் சென்று வருவர்.
இந்த நிலையில், கடந்த ஞாயிற்றுக்கிழமை வேலூர், சைதாப்பேட்டை பகுதியைச் சேர்ந்த ஆட்டோ ஓட்டுநர் ஷாயில் துணி எடுப்பதற்காக வந்து உள்ளார். அப்போது அவருடைய யமஹா வாகனத்தை கீழ் தளத்தில் உள்ள வாகனங்கள் நிறுத்தும் இடத்தில் நிறுத்திவிட்டு, துணி வாங்கிக் கொண்டு வந்து பார்த்தபோது, இருசக்கர வாகனம் இல்லாததைக் கண்டு அதிர்ச்சி அடைந்து உள்ளார்.
இது குறித்து துணிக்கடையின் பாதுகாவலரிடம் கேட்டபோது, “தாங்கள் இதற்கு பொறுப்பல்ல உங்கள் வாகனத்திற்கு நீங்கள்தான் பொறுப்பு அதை நீங்கள்தான் பாதுகாத்துக் கொள்ள வேண்டும்” எனக் கூறி உள்ளார். இதனால் ஷாயில் வடக்கு காவல் நிலையத்தில் வாகன திருட்டு குறித்து புகார் அளித்தார்.
பின்னர், போலீசார் இருசக்கர வாகனத்தை திருடும் சிசிடிவி காட்சிகளைக் கைப்பற்றி, தேடுதல் வேட்டையில் ஈடுபட்டு வந்தனர். இதனைத் தொடர்ந்து வேலூர் மாவட்டம் பள்ளிகொண்டா பகுதியில் திருடிய வாகனத்தில் வந்த நபரை போலீசார் மடக்கி பிடித்து விசாரித்துள்ளனர்.
இவ்வாறு வடக்கு காவல் நிலைய போலீசார் விசாரணை மேற்கொண்டதில், இருசக்கர வாகனத்தை திருடியது குடியாத்தம் காரப்பட்டு ஆலியா தெருவைச் சேர்ந்த வசீம் (23) என்பதும், அவர் பல்வேறு இடங்களில் இருசக்கர வாகனங்களை திருடியதும் தெரிய வந்துள்ளது. மேலும், இருசக்கர வாகனம் திருடிய நபரிடம் போலீசார் தொடர்ந்து விசாரணை மேற்கொண்டு வருகின்றனர்.
இதையும் படிங்க:Chennai Crime News:ஹெல்மெட்டை திருடிய காவல் ஆய்வாளர்.. சென்னை குற்றச் செய்திகள்!
