தூத்துக்குடியை சேர்ந்த 22 வயது இளம்பெண் ஒருவரும், அவரது காதலனும் நேற்று (செப். 8) இரவு 10 மணி அளவில், தூத்துக்குடியில் உள்ள மத்திய பாதுகாப்பு அலுவலர் குடியிருப்பு அருகே உள்ள கடற்கரை பகுதிக்கு சென்று தனிமையில் பேசிக் கொண்டிருந்ததாக தெரிகிறது. அப்போது அங்கு இரு சக்கர வாகனத்தில் வந்த 2 இளைஞர்கள், காதலனை அடித்து விரட்டி விட்டு, அந்த பெண்ணை தூக்கிச் சென்று பாலியல் வன்கொடுமை (sexual harassment) செய்ததாக கூறப்படுகிறது.
அதன் பின்னர் இளைஞர்கள் 2 பேரும் அங்கிருந்து தப்பிச் சென்றுவிட்டதாக தெரிகிறது. இது தொடர்பாக பாதிக்கப்பட்ட அந்த பெண் தெர்மல் நகர் காவல் நிலையத்தில் புகார் அளித்தார். அதனைத் தொடர்ந்து, அப்பெண்ணை மீட்ட போலீசார் தூத்துக்குடி அனைத்து மகளிர் காவல் நிலையத்தில் ஒப்படைத்தனர்.
கடற்கரை பகுதியில் உள்ள சிசிடிவி கேமரா காட்சிகளை ஆய்வு செய்த போலீசார், இந்த சம்பவத்தில் தொடர்புடைய இளைஞர்கள் 2 பேரும் யார்?, எந்த ஊரை சேர்ந்தவர்கள்? என விசாரணை மேற்கொண்டு வந்தனர். அந்த விசாரணையில் இளம்பெண்ணை பாலியல் கொடுமை செய்தது தூத்துக்குடி திம்மையார்காலனி பகுதியைச் சேர்ந்த நண்பர்கள் இருவர் என்பது தெரியவந்தது.
இதையடுத்து ஒருவரை கைது செய்த அனைத்து மகளிர் காவல் நிலைய போலீசார், அவரது நண்பரை தீவிரமாக தேடி வருகின்றனர். தூத்துக்குடியில் காதலனுடன் தனிமையில் இருந்த இளம் பெண்ணை, காதலனை அடித்து துரத்தி விட்டு இருவர் வலுக்கட்டாயமாக தூக்கிச் சென்று கூட்டுபாலியல் வன்கொடுமை செய்த சம்பவம் பெரும் பரபரப்பை ஏற்படுத்தி உள்ளது.
