இதுகுறித்து செய்தியாளர்களிடம் அவர் கூறியதாவது, "தமிழ்நாட்டில் கடந்த ஆண்டு சம்பா தாளடி சாகுபடி அறுவடைக்குத் தயாராக இருந்த நிலையில், பருவம் மாறி பெய்த மழையால் அழிந்துபோனது. நூறு விழுக்காடு பாதிக்கப்பட்டதாக அறிவித்து, அதற்கான முழு இடுபொருள் இழப்பீட்டு நிவாரணத் தொகை வழங்கப்படும் என அரசு அறிவித்தது.
கிட்டத்தட்ட 70 விழுக்காடு விவசாயிகளுக்கு இரண்டு கட்டங்களாகப் பிரித்து நிவாரணம் வழங்கப்பட்டு உள்ளது. 30 விழுக்காடு விவசாயிகளுக்கு இதுவரையிலும் முழுமையான நிவாரணம் வழங்கப்படாமல் நிலுவையில் உள்ளது. அதனை உடனடியாக வழங்குவதற்கு அரசு போர்க்கால அடிப்படையில் நடவடிக்கை மேற்கொள்ள வேண்டும்.
மாநில அளவில் நிவாரணத் தொகையை ஒருங்கிணைத்து ஆன்லைன் பணப்பரிமாற்றம் மூலம் செய்வது பல்வேறு நிர்வாக சிக்கல்களை உருவாக்கி இருக்கிறது. எனவே நிவாரணம் பழைய முறையில் வழங்கிட வேண்டும். அறுவடை முடிந்து மூன்று மாத காலங்களுக்குள் இழப்பீட்டு தொகை விவசாயிகளுக்கு வழங்கப்பட வேண்டும் என்று சட்டவிதி உள்ளது.
ஆனால், இதுவரையும் இழப்பீடு அறிவிக்காமல் காப்பீட்டு நிறுவனங்கள் காலம் கடத்தி வருவது அச்சம் அளிக்கிறது. எனவே, முதலமைச்சர் காப்பீட்டு நிறுவனங்களோடு பேச்சுவார்த்தை நடத்தி விவசாயிகளுக்கான முழு இழப்பீட்டை பெற்றுத் தர வேண்டும். வேளாண் சட்டங்களை திரும்பப் பெற வலியுறுத்தி மே 26 கறுப்புக் கொடி ஆர்ப்பாட்டம் நடத்த உள்ளோம். தமிழ்நாடு அனைத்து விவசாய சங்கங்களின் ஒருங்கிணைப்புக் குழு இப்போராட்டத்திற்கு முழு ஆதரவு அளித்துள்ளது.
ஊரடங்கு அமலில் இருப்பதைக் கருத்தில் கொண்டு, விவசாயிகள் தங்கள் வீடுகளின் முன்பு ஊரடங்கு விதிமுறைகளைப் பின்பற்றி கறுப்புக் கொடி காட்டி ஆர்ப்பாட்டத்தில் ஈடுபட வேண்டுகிறேன்" என்றார்.
இதையும் படிங்க: அறநிலையத்துறையில் ஸ்டாலினின் ஆஹா திட்டம்
