தஞ்சை மாவட்டம் பட்டுக்கோட்டையை அடுத்த நயினாங்குளம் பகுதியைச் சேர்ந்தவர் கருப்பையா. இவர் நேற்று மாலை தனக்குச் சொந்தமான வயலில் உரம் இடுவதற்காகச் சென்றுள்ளார். இரவு நீண்ட நேரம் ஆகியும் கருப்பையா வீடு திரும்பவில்லை. இதனையடுத்து அவரது குடும்பத்தினர் அவரை தேடும் பணியில் ஈடுபட்டனர். இன்று காலை வயலில் இறங்கி தேடியபோது, வயலுக்குள் இறங்கிய உறவினர் ஒருவருக்கு திடீரென மின்சாரம் தாக்கியது. இதனால் அவர் அங்கிருந்து உடனே வெளியேறினார்.
பின் அங்கிருந்தவர்கள் அந்த இடத்தை பார்வையிட்டபோது, மின்கம்பத்தின் மேலே உள்ள மின் கம்பி அறுந்து கிடந்தது தெரியவந்தது. இதையடுத்து உடனடியாக மின்சார வாரிய அலுவலகத்துக்கு தகவல் தெரிவித்ததன் பேரில் மின் ஊழியர்கள் அங்கு வந்து மின் இணைப்பை துண்டித்தனர். பின்னர் வயலின் உள்ளே இறங்கி தேடியபோது மின்சரம் தாக்கி கருப்பையா இறந்து கிடந்தார்.
பின் இதுகுறித்து பட்டுக்கோட்டை காவல் நிலையத்துக்கு தகவல் கொடுக்கப்பட்டது. தகவலின் பேரில் நிகழ்விடத்திற்கு வந்த காவல் துறையினர் கருப்பையாவின் உடலை மீட்டு உடற்கூறாய்வுக்காக அரசு மருத்துவமனைக்கு அனுப்பி வைத்தனர். மேலும் இதுகுறித்து வழக்கு பதிவு செய்து காவல் துறையினர் விசாரணை மேற்கொண்டு வருகின்றனர்.
