மதுரை அருகே உள்ள சிலைமானில் காவல் ஆய்வாளர் மாடசாமி தலைமையில் காவல் துறையினர் வாகன சோதனையில் ஈடுபட்டிருந்தனர். அப்போது, ஒரே பதிவு எண் கொண்ட இரு கண்டெய்னர் லாரிகள் மதுரையை நோக்கி வந்தது. இதனால் சந்தேகமடைந்த காவல் துறையினர் இரு கண்டெய்னர் லாரிகளையும் மடக்கிப் பிடித்து சோதனை செய்தனர்.
அதில், 20 லட்சம் ரூபாய் மதிப்புள்ள தடைசெய்யப்பட்ட புகையிலைப் பொருள்களான பான்பராக், பான் மசாலா, குட்கா உள்ளிட்டவை இருந்தன. அவை பெங்களூருவிலிருந்து சிலைமானில் உள்ள குடோனிற்கு கொண்டுச் சென்றதும் தெரியவந்தது. இதனைத்தொடர்ந்து உணவுப் பாதுகாப்புத் துறை அலுவலர்களுக்கு தகவல் தெரிவிக்கப்பட்டது. தகவலறிந்து அலுவலர்கள் குறிப்பிட்ட குடோனில் அதிரடி சோதனை நடத்தினர்.
சோதனையில் அங்கு ஏராளமான குட்கா, பான்பராக் உள்ளிட்ட புகையிலைப் பொருள்கள் பதுக்கிவைக்கப்பட்டிருந்தது தெரியவந்தது. இதையடுத்து, புகையிலைப் பொருள்கள், இரு கண்டெய்னர் லாரியை அலுவலர்கள் பறிமுதல் செய்து குடோனிற்கு சீல் வைத்தனர். இது குறித்து வழக்குப்பதிவு செய்த காவல் துறையினர் மதுரை இஸ்மாயில்புரத்தைச் சேர்ந்த சுப்புராஜ், அவரது மகன் பிரகாஷ் ஆகிய இருவரை கைது செய்தனர்.
மேலும், காவல் துறையினர் கண்டெய்னரை ஓட்டிவந்த ஓட்டுநர் சுதர்சன், திருப்பதி, கோவிந்தன் ஆகிய மூன்று பேர் மீது வழக்குப்பதிவு செய்து தேடிவருகின்றனர்.
இதையும் படிங்க:Latest Crime News:சேலத்தில் பல லட்சம் மதிப்பிலான போதைப் பொருட்கள் பறிமுதல்!
