ஈரோடு மாவட்டம் சத்தியமங்கலம் புலிகள் காப்பகத்தில் புலி, சிறுத்தை, யானை, மான், கரடி, காட்டெருமை உள்ளிட்ட பல்வேறு வகையான வனவிலங்குகள் வசிக்கின்றன. கோடை வெயில் தாக்கம் தொடங்கியுள்ளதால் வனக்குட்டைகளில் தண்ணீர் குறைந்துவிட்டது. அதனால் தலமலை வனச்சாலையில் தற்போது பகல் நேரத்தில் யானையின் நடமாட்டம் அதிகரித்துள்ளது.
திம்பம் முதல் தலமலை வரை உள்ள வனப்பகுதியில் அமைந்துள்ள தலமலை வனச்சாலையில் யானைகள் பகல் நேரங்களில் நடமாடுகின்றன. இவ்வனப்பகுதியில் அமைந்துள்ள காளிதிம்பம், மாவநத்தம், பெஜலட்டி, இட்டரை, தடசலட்டி, ராமரணை உள்ளிட்ட வனக் கிராமங்களைச் சேர்ந்த பொதுமக்கள் இச்சாலையில் பயன்படுத்துகின்றனர்.
ராமரணை பேருந்து நிறுத்தம் அருகே சாலையில் யானை நடமாடுவதோடு வாகனங்களை வழிமறிப்பதால் அக்கிராம மக்கள் மிகுந்த அச்சமடைந்துள்ளனர். இந்தநிலையில் இன்று காலை ராமரணை வனப்பகுதியில் சாலையோரம் யானை ஒன்று முகாமிட்டது. இதைக்கண்ட வாகன ஓட்டிகள் அப்பகுதியில் சாலையைக் கடக்க முடியாமல் மிகுந்த அவதிக்கு உள்ளாகினர். சுமார் ஒன்றரை மணி நேரத்துக்குப் பிறகு யானை மெதுவாக சாலையை கடந்து சென்ற பிறகு வாகன ஓட்டிகள் சாலையில் சென்றனர்.
இதையும் படியுங்க:
குழிக்குள் தவறி விழுந்த யானையை ஜேசிபி மூலம் மீட்ட வனத்துறையினர் - காணொலி!
