தருமபுரியில் மண்பாண்டத் தொழிலுக்கு உயிர் கொடுக்கும் பட்டதாரி இளைஞர்கள்!

தருமபுரி: அழிந்து வரும் மண்பாண்டத் தொழிலுக்கு உயிர் கொடுக்கும் விதமாக பட்டதாரி இளைஞர்கள் மண்பாண்டத் தொழிலாளர்களிடம் மண்பாண்டங்களைப் பெற்று வண்ணங்கள் பூசி விற்பனை செய்து வருகின்றனர்.

தருமபுரி மாவட்டத்தில், தண்டுகாரம்பட்டி, அதியமான்கோட்டை, கிருஷ்ணாபுரம் உள்ளிட்டப் பகுதிகளில் சுமார் 1,500 குடும்பங்கள் மண்பாண்டம் செய்யும் தொழிலை பாரம்பரியமாக செய்து வருகின்றனர். தற்போது, மண்பானையில் பொங்கல் வைப்பது குறைந்து வருகிறது.

அதனால், மண்பாண்டம் செய்பவர்கள் பலரும் அந்தத் தொழிலை விட்டுவிட்டு வேறு தொழில் செய்யத்தொடங்கிவிட்டனர். இந்நிலையில், மண்பாண்டத் தொழிலுக்கு உயிர் கொடுக்கும் விதமாக தருமபுரி தண்டுகாரம்பட்டி கிராமத்தைச் சேர்ந்த பட்டதாரி இளைஞர்கள் 10க்கும் மேற்பட்டோர் புதிய முயற்சியாக மண்பாண்டத் தொழிலாளர்களிடம் மண்பாண்டங்களை விலைக்கு வாங்கி அந்த மண்பாண்டங்களில் கண்ணைக் கவரும் பல வண்ணங்களைப் பூசி விற்பனைக்கு வைத்துள்ளனர்.

தருமபுரியின் முக்கிய சாலையோரங்களில் வைக்கப்பட்டுள்ள இந்தப் பானைகளை பொதுமக்கள் ஆர்வத்துடன் வாங்கிச் செல்கின்றனர். இதில், 40 ரூபாய் முதல் 600 ரூபாய் வரை உள்ள பானைகள் விற்பனைக்கு வைக்கப்பட்டுள்ளன.

இதையும் படிங்க: முதியோர் இல்லத்தில் சமத்துவ பொங்கல்