கோயம்புத்தூர்: கோவை ரயில் நிலையம் எதிரில் உள்ள தனியார் தங்கும் விடுதியில் பாஜக தேசிய மகளிர் அணி தலைவியும், கோவை தெற்குத் தொகுதி சட்டப்பேரவை உறுப்பினருமான வானதி சீனிவாசன் செய்தியாளரைச் சந்தித்தார்.
அப்போது பேசிய அவர், “மத்திய சுகாதாரம் மற்றும் குடும்ப நலத் துறை நடத்திய ஆய்வில் வளர்ந்த நாடுகளைப் போல பெண்களின் பாலினம் இந்தியாவில் அதிகரித்துள்ளது.
1000 ஆண்களுக்கு 1020 பெண்கள் என எண்ணிக்கை அதிகரித்துள்ளது. பெண் குழந்தைகளைப் பற்றிய பார்வை மாறியிருப்பது இந்த அறிக்கை வாயிலாகத் தெரிகிறது. பெண்களுக்கான பொது சுகாதாரம் 48.5 விழுக்காட்டிலிருந்து 70.2 விழுக்காடாக உயர்ந்துள்ளது. பெண்கள் வீட்டிற்காகப் பயன்படும் எரிபொருள் 43 விழுக்காட்டிலிருந்து, 58.6 விழுக்காடாக உயர்ந்துள்ளது.
பெண்கள் சுகாதாரமான மாதாந்திரத்தைக் கடைப்பிடிப்பது 57.6 விழுக்காட்டிலிருந்து 77.3 விழுக்காடாக உயர்ந்துள்ளது. பெண்களின் வங்கி நடவடிக்கைகள் - வங்கியைக் கையாளும் திறன் 53 விழுக்காட்டிலிருந்து 78.6 விழுக்காடாக உயர்ந்துள்ளது. சுகாதார பாதுகாப்பு அமைப்பு முறைகள் 28.7 விழுக்காட்டிலிருந்து 41 விழுக்காடாக உயர்ந்துள்ளது. இந்திய பெண்களின் விழுக்காடு நல்ல முறையில் உயர்ந்துவருகிறது. மகளிர் அணித் தலைவியாக இதை வரவேற்கிறேன்.
அப்ப ஒரு பேச்சு; இப்ப ஒரு பேச்சு பேசும் திமுக
கோவை தெற்குத் தொகுதியில் சாலைப் பராமரிப்புப் பணிகள் மோசமாக உள்ளன. குப்பைக் கூளங்களின் எண்ணிக்கை அதிகரித்துள்ளது. அலுவலர்கள் எதற்கெடுத்தாலும் புதிய ஒப்பந்தப் பணி என்கின்றார்கள். கோவை அடிப்படை பிரச்சினைக்கு ஏற்ப அரசாங்கம் செயல்படவில்லை. அலுவலர்கள் ஒப்பந்தத்தைச் சொல்லி காலம் தாழ்த்த வேண்டாம்.
உள்ளாட்சித் தேர்தலில் பாஜக உறுப்பினர்கள் போட்டி போட்டு மனு அளித்துவருகின்றனர். பெண்களுக்கு இன்டர்னல் கம்பிளைன்ட் கமிட்டி சரிபடவில்லை என்றால் சட்டரீதியாகச் சந்திக்கலாம்.
தமிழ்நாடு அரசு பெட்ரோல் டீசல் விலையை ஏன் குறைக்கவில்லை? திமுக, ஆட்சியில் இருந்தால் ஒரு பேச்சு ஆட்சியில் இல்லை என்றால் ஒரு பேச்சு. அரசியலுக்காகத் தேர்தலைத் தள்ளிபோடுவது, தேர்தல் வைக்கக் கேட்பது திமுகவுக்கு வாடிக்கை” எனத் தெரிவித்தார்.
இதையும் படிங்க: அதிமுக ஆட்சியில் நகைக்கடன் முறைகேடு தொடர்பான ஆய்வு; 95 விழுக்காடு நிறைவு என அமைச்சர் பெரியசாமி தகவல்
