சென்னை: சித்தா மருத்துவர் ஷர்மிகா யூடியூப், பேஸ்புக் உள்ளிட்ட இணையதளம் வாயிலாகக் குழந்தை பிறப்பு, கர்ப்பம், உடல் எடை அதிகரிப்பு, உடல் எடை குறைப்பு, மலட்டுத்தன்மை நீக்கம் உள்ளிட்ட பல்வேறு பிரச்சனைகளுக்கான தீர்வு என்ற பெயரில் பல்வேறு வீடியோக்கள் பதிவிட்டுள்ளார். அந்த வீடியோக்களை பலரும் பார்த்து ரசித்து வந்தனர். 'நீங்கள் சொல்லும் டிப்ஸ் எளிமையாகவும், புரியும் படியும் இருக்கும் மேடம் அருமை மேடம்' என்றும் ஒரு சிலர் கமெண்டுகளில் தெரிவித்துள்ளனர்.
இந்த நிலையில், கடந்த சில தினங்களாகப் பேசிய சில காணொளிகள் இணையத்தில் வைரலாக பரவியது. குலோப்ஜாம் சாப்பிட்டால் 3 கிலோ எடை அதிகரிக்கும், தலைக்குப்புற படுத்துத் தூங்கினால் மார்பக புற்றுநோய் வராது. கடவுள் மனசு வைத்தால் தான் குழந்தை உருவாகும், பனை நுங்கு சாப்பிட்டால் மார்பகம் பெரிதாகும் இப்படி பல்வேறு கருத்துக்கள் கொண்ட வீடியோ வைரலாகி பெரும் சர்ச்சையை ஏற்படுத்தியது.
ஷர்மிகாவின் இந்த வீடியோவுக்கு மருத்துவர்கள் உள்ளிட்ட பல்வேறு தரப்பினர் எதிர்ப்புக் குரல் கொடுத்தனர். இதனால் அதிர்ச்சியடைந்த ஷர்மிகா, சர்ச்சைகளுக்கு முற்றுப்புள்ளி வைக்கும் வகையில் வீடியோ ஒன்றை வெளியிட்டுள்ளார். அதில், நுங்கு சாப்பிட்டால் மார்பகம் பெரிதாகும், குலோப்ஜாம் சாப்பிட்டால் உடல் எடை அதிகரிக்கும் போன்ற கருத்துக்கள் 'ஹூமன் எரர்' வாய்த் தவறி வந்துவிட்டது. அந்த கருத்துக்களுக்கு மன்னிப்பு கேட்டுக்கொள்கிறேன் என்று பகிரங்கமாக கூறியிருந்தார்.
ஆனாலும், மக்களுக்கு தவறான மருத்துவ ஆலோசனைகளை வழங்கி மனித உயிரோடு விளையாடும் ஷர்மிகா மீது நடவடிக்கை எடுக்க வேண்டும் என இ-மெயில் மூலம் இந்திய மருத்துவ கழகத்திற்குப் பலரும் புகார் அனுப்பியதாகத் தகவல் வெளியானது. இந்நிலையில், சித்தா மருத்துவர் ஷர்மிகா வெளியிட்ட கருத்துகள் குறித்து விளக்கம் கேட்டு இந்திய மருத்துவ இயக்குனரகம் சம்மன் அனுப்பியுள்ளதாகவும், அதில், 15 நாட்களுக்குள் இந்திய மருத்துவ ஆணையர் மற்றும் தாளாளர் கொண்ட குழு முன்பு ஆஜராகி விளக்கம் அளிக்க வேண்டும் என்று குறிப்பிடப்பட்டுள்ளதாகவும் தகவல் வெளியாகியுள்ளது.
கரோனா வைரஸை குணமாக்க தன்னிடம் மருந்து இருப்பதாகவும், கரோனா தடுப்பூசி குறித்து அவதூறு பரப்பு வகையில் வீடியோ வெளியிட்ட சித்தா மருத்துவர் தணிகாசலம் கைது செய்யப்பட்டது போல், முறையான விளக்கம் அளிக்க தவறும் பட்சத்தில் ஷர்மிகா கைது செய்ய வாய்ப்பிருப்பதாக கூறப்படுகிறது.
இதையும் படிங்க: பொங்கல் பரிசுத் தொகுப்பு எப்படி வழங்கப்பட வேண்டும்.. அரசின் முக்கிய அறிவுரைகள்..
